સાઉથ ચાઈના સીમાં ચીનના કોસ્ટગાર્ડે ફિલિપાઈન્સની મિલિટરી સપ્લાય બોટ પર વોટર કેનનથી હુમલો કર્યો હતો. અલજઝીરાના અહેવાલ મુજબ, આ ઘટના શનિવારે બની જ્યારે ફિલિપાઈન્સની બોટ તેના સૈનિકો માટે ખોરાક લઈ જઈ રહી હતી. અમેરિકાએ ચીનની આ હરકતને ખતરનાક ગણાવી છે.

ચીને હજુ સુધી આ આરોપોનો જવાબ આપ્યો નથી. વાસ્તવમાં ચીન દક્ષિણ ચીન સાગરના લગભગ સમગ્ર હિસ્સા પર દાવો કરતું રહ્યું છે. ફિલિપાઈન્સે કહ્યું છે કે તે ચીનની આવી હરકતો સહન કરશે નહીં. આ આંતરરાષ્ટ્રીય કાયદાનું ઉલ્લંઘન છે. ચીને પોતાની હરકતોથી બોટમાં સવાર લોકોની સુરક્ષાને જોખમમાં મૂકી દીધી છે.

અમેરિકાએ ચીનની કાર્યવાહી પર ફિલિપાઈન્સને સમર્થન આપવાની વાત કરી છે. અમેરિકાએ કહ્યું છે કે ચીન દ્વારા સતત કરવામાં આવી રહેલી આવી ગતિવિધિઓને કારણે આ ક્ષેત્રની સુરક્ષા જોખમમાં છે. જો ફિલિપાઈન્સના જહાજો, એરક્રાફ્ટ અથવા સશસ્ત્ર દળો પર હુમલો થશે તો યુએસ 1951ની યુએસ-ફિલિપાઈન્સ સંરક્ષણ સંધિનો ઉપયોગ કરશે.

દક્ષિણ ચીન સાગર પર અમેરિકાનો કોઈ દાવો ન હોવા છતાં તે આ ક્ષેત્રમાં ચીનની કાર્યવાહીની ટીકા કરતું રહે છે. તાજેતરમાં અમેરિકાએ ફિલિપાઈન્સ સાથે સમજૂતી કરી હતી. આ અંતર્ગત અમેરિકા ફિલિપાઈન્સમાં મિલિટરી કેમ્પનો ઉપયોગ કરી શકે છે. ચીને આ કરારની આકરી ટીકા કરી હતી.