આજે ઇઝરાયેલ-હમાસ યુદ્ધનો 23મો દિવસ છે. દરમિયાન, ગાઝામાં રહેતા હજારો પેલેસ્ટિનિયનો સંયુક્ત રાષ્ટ્રની રાહત અને કાર્ય એજન્સીના વેરહાઉસ અને વિતરણ કેન્દ્રમાં પ્રવેશ્યા. અહીં રાહત સામગ્રી રાખવામાં આવી હતી. લોટ જેવી રોજીંદી ઉપયોગની ચીજવસ્તુઓ ખરીદવા લોકો અહીં ઉમટી પડ્યા હતા. અંદર પ્રવેશ્યા બાદ લોકોમાં સામાન લેવા માટે હરીફાઈ થઈ હતી.

તે જ સમયે, પીએમ બેન્જામિન નેતન્યાહૂએ સુરક્ષા દળોને દોષી ઠેરવતા ટ્વિટ માટે માફી માંગી છે. તેમણે એક નવા ટ્વીટમાં કહ્યું- હું ખોટો હતો. મેં જે કહ્યું તે ન કહેવું જોઈતું હતું અને હું તેના માટે માફી માંગુ છું. હું સુરક્ષા દળોના તમામ વડાઓને સમર્થન આપું છું.

હકીકતમાં, શનિવારે રાત્રે પીએમ નેતન્યાહૂએ કહ્યું - યુદ્ધ પછી, તમામ નેતાઓ, સરકાર અને મારે હુમલાની શરૂઆતમાં નિષ્ફળતા માટે જવાબ આપવો પડશે. તેમણે 7 ઓક્ટોબરે હમાસના હુમલા અંગે કોઈ માહિતી ન મળવા માટે સુરક્ષા દળો અને ગુપ્તચર વડાઓને જવાબદાર ઠેરવ્યા હતા.

તેમણે કહ્યું હતું કે, હુમલાને લઈને મને કોઈએ કોઈ ચેતવણી આપી નથી. ગુપ્તચર ટીમ અને શિન બેટના અધિકારીઓનું માનવું હતું કે હમાસ ડરી ગયો છે અને સમાધાન કરવા માંગે છે. નેતન્યાહુના નિવેદનની પણ ભારે ટીકા થઈ હતી. આ પછી તેમણે સોશિયલ મીડિયા પર નિવેદન સાથે સંબંધિત ટ્વિટ ડિલીટ કરી દીધું.

ઇઝરાયલના પીએમએ પ્રેસ કોન્ફરન્સ દરમિયાન જાહેરાત કરી કે ઇઝરાયલમાં યુદ્ધનો બીજો તબક્કો શરૂ થઈ ગયો છે. ઇઝરાયલની સેના ગાઝામાં ઘૂસીને હુમલો કરી રહી છે. નેતન્યાહૂએ કહ્યું- આ ઇઝરાયલની આઝાદીની બીજી લડાઈ છે. ઇઝરાયલીઓએ લાંબા અને મુશ્કેલ અભિયાન માટે તૈયાર રહેવું પડશે.

ઇઝરાયલના PMએ કહ્યું- યુદ્ધમાં અમારો ઉદ્દેશ્ય એકદમ સ્પષ્ટ છે. અમે હમાસનો નાશ કરીશું અને બંધકોને ઘરે પાછા લાવીશું. હુમલાથી બચવા માટે હમાસ સામાન્ય લોકોને ઢાલ તરીકે ઉપયોગ કરી રહ્યું છે. માનવતા અને આપણા અસ્તિત્વના રક્ષણ માટે આપણે હમાસને જડમૂળથી ઉખેડી નાખવું જોઈએ.