વૈષ્ણો દેવી યાત્રા રૂટ પર અર્ધકુમારી નજીક ભૂસ્ખલનમાં 6 લોકોના મોત થયા છે અને 14 ઘાયલ થયા છે. ઘાયલોને સામુદાયિક આરોગ્ય કેન્દ્ર કટરા લઈ જવામાં આવ્યા છે. ખરાબ હવામાનને કારણે વૈષ્ણો દેવી યાત્રા મુલતવી રાખવામાં આવી હતી. વૈષ્ણો દેવીના દર્શન કરીને પરત ફરી રહેલા શ્રદ્ધાળુઓ અકસ્માતનો ભોગ બન્યા હતા.

અહીં, જમ્મુમાં તાવી નદી પરના પુલ પાસે રસ્તો તૂટી ગયો છે. અકસ્માતમાં ઘણા વાહનો નીચે ખાબક્યા છે. પોલીસ બચાવ માટે પહોંચી ગઈ છે. નુકસાન અંગે હજુ સુધી કોઈ અપડેટ નથી.

મંગળવારે જમ્મુ અને કાશ્મીરના ડોડા જિલ્લામાં વાદળ ફાટવાના કારણે ઘણી જગ્યાએ અચાનક પૂર આવ્યું. તેમાં 10થી 15 ઘરો તણાઈ ગયા. છેલ્લા 24 કલાક દરમિયાન ડોડામાં 4 લોકોના મોત થયા છે. જોકે, આ મૃત્યુ કયા વિસ્તારોમાં થયા તેની માહિતી જાહેર કરવામાં આવી નથી.

જમ્મુ અને કાશ્મીરમાં સતત ત્રણ દિવસથી ભારે વરસાદ પડી રહ્યો છે. બે દિવસથી શાળાઓ બંધ છે. જમ્મુ-શ્રીનગર અને બટોટ-કિશ્તવાડ સહિત ઘણા રસ્તાઓ અને ઘણા રાષ્ટ્રીય ધોરીમાર્ગો બંધ છે. ઘણી જગ્યાએ નેટવર્કના અભાવે લોકો ઇન્ટરનેટ અને કોલ કોલિંગ સેવાઓનો ઉપયોગ કરી શકતા નથી.