વૈશ્વિક સ્તરે માત્ર ભારતમાં જ વેપાર ખાધમાં જંગી વધારો થયો નથી પરંતુ અમેરિકામાં પણ આ સ્થિતિ સર્જાઇ છે. 2018થી અમેરિકા અને ચીન વચ્ચેના રાજદ્વારી સંબંધોમાં તણાવ ચરમસીમા પર છે તેમ છતાં 2022માં તેમની વચ્ચે 690 બિલિયન ડોલર (57 લાખ કરોડ રૂપિયા) નો રેકોર્ડ વેપાર થયો હતો. યુ.એસ.થી ચીનમાં મર્ચેન્ડાઇઝની નિકાસ $153.8 બિલિયન (રૂ. 12.69 લાખ કરોડ)ની સર્વોચ્ચ સપાટીએ પહોંચી છે, જ્યારે ચીનમાંથી આયાત $536.8 બિલિયન (રૂ. 44.3 લાખ કરોડ) પર પહોંચી છે.

એશિયન ટ્રેડ સેન્ટરના સ્થાપક ડેબોરાહ એલ્મ્સના જણાવ્યા અનુસાર આ આંકડા દર્શાવે છે કે સરકારોના મતભેદો હોવા છતાં બે મોટી અર્થવ્યવસ્થાઓની કંપનીઓ અને વપરાશકર્તાઓ વચ્ચેના સંબંધો મજબૂત છે.

ગતવર્ષે અમેરિકાની ચીનથી વેપાર ખાધ પણ 8 ટકા વધીને 31.6 લાખ કરોડ રૂપિયા પહોંચી ગઇ છે. જે 2018ના 34.6 લાખ કરોડ પછી બીજી વખત સૌથી વધુ વેપાર ખાધ રહી છે. અમેરિકામાં હજુ વેપાર ખાધ વધી શકે છે.