વૈશ્વિક સ્તરે ભારતનો મજબૂત ઇકોનોમી ગ્રોથ, બહૂમત સાથે સ્થિર સરકારનો આશાવાદ, વિદેશી રોકાણકારોનો સતત વધી રહેલો ભારતીય શેરબજાર પરનો ભરોસો તેજીને વેગ આપનારો બની રહેશે. શેરમાર્કેટમાં આ મહિને પણ મજબૂતીનો અણસાર છે. ચાલુ માસમાં અત્યાર સુધીમાં સરેરાશ બે ટકાની તેજી થઇ ચૂકી છે. 10 એપ્રિલ એટલે કે મંગળવારે સેન્સેક્સ અને નિફ્ટી અંદાજે 0.50%ની તેજી સાથે નવી ઉંચાઇ પર બંધ રહ્યાં હતા.

ગત વર્ષે એપ્રિલમાં નિફ્ટી 50 ઇન્ડેક્સ 4%થી વધુ વધ્યો હતો. છેલ્લા 10 વર્ષમાં 6 વર્ષ દરમિયાન બેન્ચમાર્ક ઇન્ડેક્સમાં તેજી જોવા મળી છે. 2020માં તેમાં રેકોર્ડ 14.7%નો ઉછાળો આવ્યો હતો. મહત્વની વાત એ છે કે છેલ્લા પાંચ લોકસભા ઇલેક્શન વર્ષમાંથી ચાર વર્ષ એપ્રિલ મહિનામાં મજબૂતી જોવા મળી છે. 2009ના વર્ષના ઇલેક્શનમાં એપ્રિલમાં સૌથી વધુ 15 ટકાની તેજી જોવા મળી હતી.

બીજી તરફ છેલ્લા એક દાયકામાં આ ઇન્ડેક્સમાં કોઇપણ વર્ષે એપ્રિલમાં 3.65%થી વધુ ઘટાડો જોવા મળ્યો નથી. નેશનલ સ્ટોક એક્સચેન્જના ડેટા દર્શાવે છે કે છેલ્લા 10 વર્ષમાં નિફ્ટી 50નું સરેરાશ રિટર્ન વાર્ષિક 2.3% રહ્યું છે. જોકે, આ સમયગાળા દરમિયાન, નિફ્ટી મિડકેપ ઇન્ડેક્સ 8 વખત વધ્યો છે અને તેનું સરેરાશ રિટર્ન વાર્ષિક ધોરણે 3.7% રહ્યું છે. જેએમ ફાઇનાન્શિયલના એક અહેવાલ મુજબ, છેલ્લા એક દાયકામાં, નિફ્ટી મિડકેપ ઇન્ડેક્સે 9 વખત નિફ્ટી 50 ઇન્ડેક્સ કરતાં વધુ સારો દેખાવ કર્યો છે. તેનું સરેરાશ રિટર્ન બેન્ચમાર્ક ઇન્ડેક્સ કરતાં 1.4% વધુ રહ્યું છે. પરંતુ છેલ્લા એક મહિનાથી મિડકેપ ઇન્ડેક્સનું પ્રદર્શન નિફ્ટી 50 કરતાં નબળું રહ્યું છે.