વેનેઝુએલાના રાષ્ટ્રપતિ નિકોલસ માદુરોને ન્યૂયોર્ક કોર્ટમાં રજૂ કરવામાં આવ્યા. તેમણે અદાલતમાં પોતાના પર લાગેલા તમામ આરોપોને ખોટા ગણાવ્યા. માદુરોએ કહ્યું કે તેમણે કોઈ ગુનો કર્યો નથી. તેઓ સભ્ય વ્યક્તિ છે. કોર્ટમાં આજની સુનાવણી પૂર્ણ થઈ છે. આગામી સુનાવણી 17 માર્ચે થશે.

જજ અલ્વિન હેલેરસ્ટેને માદુરોને ચેતવણી આપી કે આ પ્રકારના નિવેદનો પાછળથી તેમની વિરુદ્ધ ઉપયોગમાં આવી શકે છે. સાથે જ કહ્યું કે આ મુદ્દાઓ પર ચર્ચા કરવાનો સમય પછીથી આવશે.

ત્યાં જ, માદુરોના વકીલોએ ધરપકડને 'સૈન્ય અપહરણ' ગણાવતા કહ્યું કે આ આંતરરાષ્ટ્રીય કાયદા અને કાનૂની પ્રક્રિયાનું ઉલ્લંઘન છે. બચાવ પક્ષ અમેરિકી અદાલતોના અધિકાર ક્ષેત્ર (જ્યુરિસડિક્શન) ને પણ પડકારવાની તૈયારીમાં છે.

ધ ગાર્ડિયન મુજબ, માદુરો પર ચાર મોટા આરોપો મૂકવામાં આવ્યા છે, જેમાં અમેરિકામાં કોકેઈન મોકલવાનું કાવતરું અને ખતરનાક હથિયારો રાખવા જેવા આરોપો સામેલ છે. અદાલતમાં માદુરો અને તેમની પત્ની સિલિયા ફ્લોરેસને એકસાથે રજૂ કરવામાં આવ્યા હતા. માદુરોની આ પહેલી સુનાવણી છે.