ગાંધીનગર કોર્પોરેશનને નાણાકીય વર્ષ 2022-23ના વર્ષમાં અત્યાર સુધી પ્રોપર્ટી ટેક્સની 40 કરોડથી વધુ આવક થઈ છે. કોર્પોરેશન વિસ્તારમાં નવા-જુના વિસ્તાર મળીને રેસિડેન્ટ તથા કોમર્શિયલ મળીને 1.74 લાખ જેટલી પ્રોપર્ટી છે. જોકે આ પ્રોપર્ટીમાંથી પાટનગર યોજના વિભાગ હસ્તક આવતી પ્રોપર્ટીનો ટેક્સ મનપાને મળતો નથી. ગાંધીનગર કોર્પોરેશન દ્વારા પ્રોપર્ટી ટેક્સના બાકી લેણા માટે નાગરિકોને નોટિસો આપીને વેરો વસૂલ કરવામાં આવે છે. ત્યારે કોર્પોરેશનને પોતાના વિસ્તારમાં આવેલી સરકારી કચેરીઓ, આવાસ સહિતનો 40 કરોડથી વધુનો પ્રોપર્ટી ટેક્સનું લેણું બાકી બોલે છે.

કોર્પોરેશનની સ્થાપના સમયથી જ ગાંધીનગરમાં આવેલા જૂના સચિવાયલ, નવા સચિવાયલ, રાજભવ, સીએમ હાઉસ, મંત્રી નિવાસ અને જિલ્લાની કચેરીઓનો પ્રોપર્ટી ટેક્સ કોર્પોરેશનમાં ભરાયો નથી. સામાન્ય નાગરિકો પાસેથી 18 ટકાનું વ્યાજ અને જરૂર પડે તો મિલકતો સીલ કરવા સુધીની કાર્યવાહી કોર્પોરેશન કરે છે.