શહેરના અત્યંત સંવેદનશીલ મનાતા પાણીગેટ વિસ્તારમાં આવેલ ખાનકાહ મહોલ્લા પાસે મોડી રાત્રે ક્રિકેટ રમવા બાબતે થયેલા ઝઘડામાં બે કોમના ટોળા સામ સામે આવી ગયા હતા અને પથ્થર મારો શરૂ થયો હતો. આ ઘટનામાં એક યુવાન ઉપર તિક્ષ્ણ હથિયારથી હુમલો કરાયો હોવાનું જાણવા મળ્યું હતું. તોફાની ટોળા દ્વારા ઓટો રીક્ષા, ટુ વ્હીલર સહિત વાહનોની તોડફોડ પણ કરવામાં આવી હતી. આ બનાવને પગલે વિસ્તારમાં દોડધામ મચી ગઈ હતી. જોકે આ બનાવ ઉગ્ર સ્વરૂપ ધારણ કરે તે પહેલા ઉચ્ચ પોલીસ અધિકારીઓ સહિતનો પોલીસ કાફલો ઘટના સ્થળે દોડી ગયો હતો અને મામલો થાળે પાડ્યો હતો.

મળેલી માહિતી પ્રમાણે પાણીગેટ વિસ્તારમાં ખાન કા હે મોહલા પાસે છોકરાઓ ક્રિકેટ રમી રહ્યા હતા. તે દરમિયાન બે છોકરાઓ વચ્ચે ક્રિકેટ રમતા ઝઘડો થયો હતો. આ ઝઘડો મોટા લોકોમાં પરિણામતા મામલો બિચકયો હતો અને જોતજોતામાં બંને કોમના ટોળા સામસામે આવી ગયા હતા અને પથ્થર મારો શરૂ કરી દીધો હતો. પથ્થર મારો શરૂ થતાની સાથે જ ભાગદોડ મચી ગઈ હતી. તોફાની ટોળાએ ઓટો રીક્ષા, ટુ-વ્હીલર સહિત વાહનોની તોડફોડ કરી હોવાનું જાણવા મળ્યું હતું.