અમેરિકાનો દક્ષિણ પૂર્વ વિસ્તાર તબાહ થઈ ગયો છે. ખાસ કરીને ફ્લોરિડામાં ઇયાન વાવાઝોડાએ ભયાનક તબાહી મચાવી છે. હવે આ વાવાઝોડું સાઉથ કેરોલિના તરફ આગળ વધી રહ્યું છે. દરિયામાંથી બોટ સીધી લોકોના ઘર સુધી પહોંચી ગઈ છે. નાના વિમાનો પાર્કિંગ એરિયામાંથી સરકીને ખાડાઓમાં પડી ગયા છે. કેટલીક જગ્યાએ તો તે રસ્તાની બાજુમાં પડેલા જોવા મળે છે. વીજ થાંભલા તૂટી ગયા છે. મોબાઇલ સર્વિસ બંધ હોવાથી કોમ્યુનિકેશન વ્યવસ્થા ઠપ થઈ ગઈ છે. રેસ્ક્યુ ટીમ ફ્લોરિડામાં ફસાયેલા લોકોની મદદ માટે મહેનત કરી રહી છે.

ફ્લોરિડા રાજ્યના 18 લાખ લોકો અંધારામાં જીવવા માટે મજબૂર બન્યાં છે. વાવાઝોડું ઈયાન ફ્લોરિડાના કિનારે 240 કિલોમીટર પ્રતિ કલાકની ઝડપે ત્રાટક્યું હતું અને ત્યારથી સતત ભારે વરસાદ પડી રહ્યો છે. ફ્લોરિડાના ઘણા વિસ્તારોમાં પૂરની સ્થિતિ સર્જાઈ છે. નિષ્ણાતોનો અંદાજ છે કે આ વાવાઝોડામાં 260 અબજ ડોલરથી વધુનું નુકસાન થયું છે.