મંગળવારે સ્વીડનમાં એક વયસ્કોની એક શાળામાં થયેલા ગોળીબારમાં દસ લોકોના મોત થયા હતા. આ હુમલામાં એક વ્યક્તિ ગંભીર રીતે ઘાયલ થયો છે. સ્થાનિક અખબાર સ્વીડિશ હેરાલ્ડ અનુસાર, રાજધાની સ્ટોકહોમથી 200 કિમી પશ્ચિમમાં ઓરેબ્રો શહેરની રિસબર્ગસ્કા સ્કૂલમાં બપોરે 1 વાગ્યે ગોળીબાર થયો હતો. આ ઘટના ત્યારે બની જ્યારે મોટાભાગના વિદ્યાર્થીઓ શાળામાં હાજર હતા.

સ્વીડિશ પોલીસે કહ્યું - પોલીસે કહ્યું કે તેઓ મૃતકોની ઓળખ કરી રહ્યા છે. તેઓ હુમલાખોરોના હેતુ જાણવાનો પ્રયાસ કરી રહ્યા છે પરંતુ હાલમાં તેમને નથી લાગતું કે આ ઘટના આતંકવાદ સાથે જોડાયેલી છે. ઘાયલોની સંખ્યા પણ વધી શકે છે.

હાલમાં ખતરો હજુ ટળ્યો નથી તેથી લોકોને આ વિસ્તારથી દૂર રહેવાની સલાહ આપવામાં આવી છે. ઘણા સ્થાનિક મીડિયા અહેવાલોમાં, હુમલાખોર સીરિયન મૂળનો હોવાનું કહેવામાં આવી રહ્યું છે. જોકે, તેની સત્તાવાર જાહેરાત કરવામાં આવી નથી.

ડેઇલી એક્સપ્રેસ યુકેના અહેવાલ મુજબ, આ વર્ષે જાન્યુઆરીમાં સ્વીડનમાં 31 સ્થળોએ વિસ્ફોટ થયા હતા. આ ઉપરાંત કુરાન બાળીને દુનિયાભરમાં ચર્ચામાં આવેલા સલવાન મોમિકાનું પણ ખૂન કરવામાં આવ્યું હતું. આ હત્યામાં વિદેશી કનેક્શનની તપાસ કરવામાં આવી રહી છે.