સોશિયલ મીડિયાના ઉપયોગે આપણું જીવન તો સરળ બનાવી દીધું છે. પણ આ જ સોશિયલ મીડિયાનો કેટલાક લોકો ગેરલાભ ઉઠાવીને આપણી સાથે છેતરપિંડી કરે છે. આ લોકોના કારણે નિર્દોષ લોકો ભોગ બને છે. અત્યારે સાયબર માફિયાઓ PGVCL અને અલગ અલગ મોટી કંપનીઓના નામ આપીને આપણી સાથે છેતરપિંડી કરે છે. એવામાં રાજકોટમાં અત્યારે PGVCLના કર્મચારી હોવાનું કહીને મોટા મોટા ફ્રોડ કરવામાં આવી રહ્યા છે. જેની પોલીસ ફરિયાદ પણ પોલીસ ચોપડે નોંધાઈ છે. આ અંગે PGVCLના MDએ અપીલ કરી છે કે, કોઈ ‘વીજબિલ બાકી છે, કનેક્શન કપાઇ જશે’નો મેસેજ કરે તો દૂર રહેજો.

સાયબર માફિયાઓ પોતે PGVCLના કર્મચારી હોવાનું કહીને બાકી બિલ ભરવાનું કહીને લીંક મોકલે છે અને પોતાના ખાતામાં પૈસા ટ્રાન્સફર કરાવી લે છે. આ માફિયાઓ લોકોને 'ડીઅર કસ્ટમર તમારું વીજ કનેક્શન બાકી છે, તમારું વીજ કનેક્શન કટ થઇ જશે.' આવો મેસેજ કરે છે. બાદમાં ફોન કરીને પણ તમને જાણ કરે છે. આથી તમે બિલ ભરી દો અને બિલ ભરવા માટે લિંક પણ મોકલે છે.