ઈરાન અને ઇઝરાયલ વચ્ચે ચાલી રહેલા સંઘર્ષ વચ્ચે ભારત સરકારે ઈરાનની ઉર્મિયા મેડિકલ યુનિવર્સિટીમાં અભ્યાસ કરતા લગભગ 110 ભારતીય વિદ્યાર્થીઓને સુરક્ષિત રીતે બહાર કાઢ્યા છે. આમાંથી 90 વિદ્યાર્થીઓ કાશ્મીરના છે.

ઈરાનથી બહાર કાઢવામાં આવેલા આ વિદ્યાર્થીઓ મંગળવારે આર્મેનિયા પહોંચ્યા, જ્યાં તેમને રાજધાની યેરેવનની હોટલોમાં રાખવામાં આવ્યા.

આ પછી, આજે તેમને કતાર થઈને ભારત લાવવામાં આવી રહ્યા છે. આર્મેનિયાના યેરેવન એરપોર્ટથી આ વિદ્યાર્થીઓને લઈને ઈન્ડિગોની એક ફ્લાઇટ કતારની રાજધાની દોહા માટે રવાના થઈ છે.

આ પછી, તેમને દોહાથી બીજી ફ્લાઇટ દ્વારા નવી દિલ્હીના ઇન્દિરા ગાંધી એરપોર્ટ લાવવામાં આવશે. આ પહેલા મંગળવારે ભારતીય વિદેશ મંત્રાલયે ઈરાનથી વિદ્યાર્થીઓને બહાર કાઢવાની પુષ્ટિ કરી હતી.