પૂર્વ પીઆઇ ફર્નાન્ડિસની મુશ્કેલીમાં વધારો થયો છે કારણ કે દુષ્કર્મ કેસમાં ધરપકડથી બચવા માટે કરવામાં આવેલ આગોતરા જામીન અરજી સેશન્સ કોર્ટ દ્વારા ના મંજુર કરવામાં આવી છે. રાજકોટમાં ફરજ બજાવી ચૂકેલ પીઆઈ વી. જે. ફર્નાન્ડિસે મિત્રતા કેળવી રાજકોટની ટ્રાફિક વોર્ડન યુવતીને લગ્નની લાલચ આપી શરીર સંબંધ બાંધ્યો હોવાના આક્ષેપ સાથે મહિલા પોલીસ સ્ટેશનમાં ફરિયાદ નોંધાઈ હતી. જેમાં ધરપકડથી બચવા ફર્નાન્ડિસે આગોતરા જામીન માંગ્યા હતાં, જેને કોર્ટે ફગાવી દીધા છે. ઉલ્લેખનીય છે કે, આશરે બે મહિના પહેલા સરકારે વી. જે. ફર્નાન્ડિસને ફરજીયાત નિવૃત્તિનો હુકમ કર્યો હતો અને તે સમયે અમદાવાદ ખાતે પીઆઇ તરીકે ફરજ બજાવતા હતા.

મહિલાને લગ્નની લાલચ આપી અવાર નવાર શરીર સંબંધ બાંધ્યો ગત તા. 26 જુલાઈ, 2025ના રોજ ફરિયાદી મહિલાએ રાજકોટ મહિલા પોલીસ સ્ટેશનમાં ફરિયાદ નોંધાવી જણાવ્યું હતું કે, વર્ષ 2019થી 2022 દરમિયાન પોલીસ ઈન્સ્પેક્ટર વિકટર જોહન ફર્નાન્ડિસ જ્યારે બી. ડિવિઝન પોલીસ સ્ટેશનમાં પોલીસ ઈન્સ્પેક્ટર તરીકે ફરજ બજાવતાં હતાં. ત્યારે તેમના કાર્યક્ષેત્ર વિસ્તારમાં ટ્રાફિક બ્રિગેડમાં ફરિયાદી મહિલા ફરજ બજાવતાં હતાં, ત્યારે ફરિયાદી મહિલા સાથે પોલીસ ઈન્સ્પેક્ટર વી. જે. ફર્નાન્ડિસે મિત્રતા કેળવી મહિલાને લગ્નની લાલચ આપી મહિલાની ઈચ્છા વિરુદ્ધ મહિલા સાથે અવાર નવાર શરીર સંબંધ બાંધી આરોપીએ અન્ય સ્ત્રી સાથે લગ્ન કરી લીધેલ હોવાની ફરિયાદ સ્ત્રીએ પોલીસ સ્ટેશનમાં નોંધાવતા તે ફરિયાદ મહિલા પોલીસ સ્ટેશનમાં નોંધાતા તે ગુનાના કામે ધરપકડથી બચવા માટે હાલ સસ્પેન્શન ઉપર રહેલ પોલીસ ઇન્સ્પેક્ટર વી. જે. ફર્નાન્ડીસે સેશન્સ કોર્ટમાં આગોતરા જામીન અરજી કરી હતી.