અફઘાનિસ્તાનની KAM એરલાઇન્સની ફ્લાઇટ RQ-4401 કાબુલના હામિદ કરઝાઈ એરપોર્ટથી સવારે 8:46 વાગ્યે IST પર ઉડાન ભરી હતી અને સવારે 10:20 વાગ્યે દિલ્હીના ઇન્દિરા ગાંધી આંતરરાષ્ટ્રીય એરપોર્ટના ટર્મિનલ 3 પર લેન્ડ થઈ હતી.

એરલાઇન સ્ટાફે ફ્લાઇટની નજીક એક છોકરાને ભટકતો જોયો. તેમણે તાત્કાલિક અધિકારીઓને જાણ કરી. ત્યાર બાદ CISFએ કિશોરની અટકાયત કરી અને તેને પોલીસને સોંપી દીધો.

અફઘાનિસ્તાનના કુન્દુઝના રહેવાસી આ છોકરાએ અધિકારીઓને જણાવ્યું કે તેણે જિજ્ઞાસાથી આ કર્યું છે. તે જોવા માગતો હતો કે કેવું લાગે છે.

સોમવારે, અધિકારીઓએ જણાવ્યું હતું કે કિશોર કાબુલ એરપોર્ટમાં ઘૂસી ગયો હતો અને વિમાનના પાછળના લેન્ડિંગ ગિયર કમ્પાર્ટમેન્ટમાં પ્રવેશવામાં સફળ રહ્યો હતો. સંપૂર્ણ તપાસ પછી વિમાનને સલામત જાહેર કરવામાં આવ્યું હતું. એ જ દિવસે એ જ ફ્લાઇટમાં કિશોરને અફઘાનિસ્તાન પરત મોકલવામાં આવ્યો હતો.