ઇલોન મસ્કની કંપની સ્પેસએક્સે ભારતમાં તેની સેટેલાઇટ ઇન્ટરનેટ સર્વિસ 'સ્ટારલિંક'ની કિંમતની જાહેરાત કરી દીધી છે. રેસિડેન્શિયલ પ્લાન માટે યુઝર્સને દર મહિને ₹8,600 ચૂકવવા પડશે. જ્યારે, હાર્ડવેર તરીકે એક સેટેલાઇટ ડિશ કિટ લેવી પડશે, જેની કિંમત ₹34,000 છે.

યુઝર્સને 30 દિવસ ટ્રાયલની તક મળશે

કંપનીએ કહ્યું છે કે, 'યુઝર્સને પહેલા 30 દિવસના ટ્રાયલનો મોકો મળશે, જો તેઓ તેનાથી સંતુષ્ટ નહીં હોય તો પૂરા પૈસા રિફંડ થઈ જશે.' સર્વિસ જાન્યુઆરી 2026 સુધીમાં શરૂ થઈ શકે છે. સેટેલાઇટ ઇન્ટરનેટ સર્વિસ શરૂ થવાથી અનલિમિટેડ ડેટા સાથે 99.9% અપટાઇમ મળશે, જે ગ્રામીણ અને દૂરના વિસ્તારો માટે ગેમ ચેન્જર સાબિત થઈ શકે છે.

સેટેલાઇટ પૃથ્વીના કોઈપણ ભાગમાંથી બીમ ઇન્ટરનેટ કવરેજને શક્ય બનાવે છે. સેટેલાઇટના નેટવર્કથી યુઝર્સને હાઈ-સ્પીડ, લો-લેટન્સી ઇન્ટરનેટ કવરેજ મળે છે. લેટન્સીનો અર્થ તે સમયથી થાય છે, જે ડેટાને એક પોઈન્ટથી બીજા સુધી પહોંચાડવામાં લાગે છે.

સ્ટારલિંક કિટમાં સ્ટારલિંક ડિશ, એક વાઇ-ફાઇ રાઉટર, પાવર સપ્લાય કેબલ્સ અને માઉન્ટિંગ ટ્રાઇપોડ હોય છે. હાઈ-સ્પીડ ઇન્ટરનેટ માટે ડિશને ખુલ્લા આકાશ નીચે રાખવી પડશે. iOS અને એન્ડ્રોઇડ પર સ્ટારલિંકનું એપ ઉપલબ્ધ છે, જે સેટઅપથી લઈને મોનિટરિંગ કરે છે.