ભારતીય રેલવેએ રેલવન (RailOne) એપ દ્વારા અનરિઝર્વ્ડ (જનરલ) ટિકિટ બુક કરવા પર ભાડામાં 3% ડિસ્કાઉન્ટ આપવાની જાહેરાત કરી છે. રેલ મંત્રાલય અનુસાર, આ ઓફર 14 જાન્યુઆરી 2026 થી 14 જુલાઈ 2026 સુધી એટલે કે 6 મહિના માટે લાગુ રહેશે.

રેલવેએ આજે (30 ડિસેમ્બર) સેન્ટર ફોર રેલવે ઇન્ફોર્મેશન સિસ્ટમ (CRIS)ને પત્ર મોકલીને સોફ્ટવેરમાં ફેરફાર કરવા જણાવ્યું છે. ખાસ વાત એ છે કે આ ડિસ્કાઉન્ટ ફક્ત R-વોલેટ સુધી મર્યાદિત રહેશે નહીં, પરંતુ કોઈપણ ડિજિટલ પેમેન્ટ મોડ (જેમ કે UPI, ક્રેડિટ/ડેબિટ કાર્ડ અથવા નેટ બેન્કિંગ)થી ચુકવણી કરવા પર મળશે.

રેલવે અનુસાર, હાલમાં રેલવન એપ પર R-વોલેટથી પેમેન્ટ કરવા પર 3% કેશબેક મળે છે, જે આગળ પણ ચાલુ રહેશે. નવી સુવિધામાં ડિજિટલ રીતે પેમેન્ટ કરવા પર સીધું 3% ડિસ્કાઉન્ટ આપવામાં આવશે. એટલે કે 14 જાન્યુઆરીથી રેલવન એપથી ટિકિટ બુકિંગ કરવા માટે R-વોલેટથી પેમેન્ટ કરવા પર કુલ 6% ડિસ્કાઉન્ટ મળશે.

અન્ય કોઈ પ્લેટફોર્મ પર આ છૂટ મળશે નહીં

રેલવે અધિકારીઓએ સ્પષ્ટ કર્યું છે કે 3% ડિસ્કાઉન્ટની આ ઓફર ફક્ત રેલવન એપ પર જ ઉપલબ્ધ હશે. જો મુસાફરો અન્ય કોઈ ઓનલાઈન પ્લેટફોર્મ કે વેબસાઈટ પરથી જનરલ ટિકિટ બુક કરે છે, તો તેમને ડિસ્કાઉન્ટ મળશે નહીં. આનો ઉદ્દેશ્ય મુસાફરોને રેલવેની સત્તાવાર એપ તરફ વાળવાનો છે જેથી સ્ટેશનો પર ટિકિટ કાઉન્ટરો પર થતી ભીડ ઘટાડી શકાય.