ગુડ્સ એન્ડ સર્વિસ ટેક્સ (જીએસટી) કાઉન્સિલની બેઠકમાં કોઈપણ સામાન પર ટેક્સ વધારવામાં આવ્યો નથી. આ સાથે, GST કાઉન્સિલે વ્યવસાયને સરળ બનાવવા માટે ફોજદારી કાર્યવાહીમાં રાહત આપી છે. કેન્દ્રીય નાણામંત્રી નિર્મલા સીતારમણની અધ્યક્ષતામાં શનિવારે કાઉન્સિલની 48મી બેઠક ઓનલાઈન યોજાઈ હતી.

કરચોરીના કેસમાં આપવામાં આવી રાહત
નિર્મલા સીતારમણે કહ્યું કે, સમયની અછતને કારણે GST કાઉન્સિલના એજન્ડામાં સમાવિષ્ટ 15માંથી 8 મુદ્દા પર જ નિર્ણય લઈ શકાયો. અગાઉ 1 કરોડથી વધુની કરચોરીના કિસ્સામાં ફોજદારી કેસ નોંધવાની સિસ્ટમ હતી. હવે તે વધારીને 2 કરોડ રૂપિયા કરવામાં આવી છે.

નકલી ઈનવોઈસના કેસમાં આ ફોજદારી કાર્યવાહી રૂ. 1 કરોડ પછી જ શરૂ થશે. નકલી ઈનવોઈસમાં એવા કિસ્સાઓ સામેલ હશે જ્યાં માલનો પુરવઠો માત્ર કાગળ પૂરતો મર્યાદિત હતો. પાન મસાલા અને ગુટખાના ધંધામાં કરચોરી અટકાવવાના મુદ્દા પર ચર્ચા થઈ શકી નથી. ઓનલાઈન ગેમિંગ અને કેસિનો પર GST વસૂલવાની ચર્ચા થઈ શકી નથી.

આમાં ફોજદારી કેસ કરવામાં આવશે નહીં

અધિકારીને તેની ફરજો નિભાવવામાં અવરોધ કરવો અથવા તેને તેની ફરજ બજાવતા અટકાવવો.
ભૌતિક પુરાવા સાથે ઇરાદાપૂર્વક છેડછાડ.
નોટિસ આપવામાં નિષ્ફળતા.
SUV અને ભાડે રાખનારાઓના કિસ્સામાં સ્પષ્ટતા GST કાઉન્સિલની બેઠકમાં SUV વાહનોની વ્યાખ્યા નક્કી કરવામાં આવી છે. આ મુજબ, 1500CCથી વધુ ક્ષમતા, 4000 mmથી વધુ લંબાઈ અને 170 mmથી વધુ ગ્રાઉન્ડ ક્લિયરન્સ ધરાવતા વાહનોને SUV કહેવામાં આવે છે. મીટિંગમાં કહેવામાં આવ્યું છે કે SUV પર 28% GST અને 22% સેસ લાગશે. આ કિસ્સામાં, આના પર અસરકારક ટેક્સ દર 50% હશે.

કાઉન્સિલે તમામ રાજ્યોમાં સમાન સિસ્ટમ માટે કેટલીક સ્પષ્ટતાઓ પણ જારી કરી હતી. ઉદાહરણ તરીકે, 22% સેસ ફક્ત તે વાહનો પર જ લાગુ ગણવામાં આવશે જે આ 4 શરતો હેઠળ આવશે-

કાર SUV હોવી જોઈએ.
એન્જિન ક્ષમતા 1500 CC કરતાં વધુ.
વાહનની લંબાઈ 4000 MMથી વધુ હોવી જોઈએ.
ગ્રાઉન્ડ ક્લિયરન્સ 170 MM અથવા વધુ હોવું જોઈએ.