આવકવેરા વિભાગની ઇન્વેસ્ટિગેશન વિંગ દ્વારા ગોરાટ રોડ પર રહેતા મેમણ ઉદ્યોગપતિ ઉમર જનરલને ત્યાં હાથ ધરેલાં દરોડા બીજા દિવસે પણ યથાવત રહ્યા હતા. તપાસમાં અત્યાર સુધી કરોડોના ડોક્યુમેન્ટ જપ્ત કરવામાં આવ્યા છે ઉપરાંત રોકડમાં થયેલાં વ્યવહારો પણ અધિકારીઓએ શોધી રહ્યાં છે. હવાલા એન્ગલની પણ તપાસ અધિકારીઓ કરી રહ્યા છે. બંગ્લો એટલો આલિશાન હોય તપાસ ટીમને 22થી વધુ રૂમ ચેક કરવામાં જ દોઢ દિવસ લાગ્યા હતા. બંગ્લાનો ખુણેખુણો અધિકારીઓ ચકાસી રહ્યા છે.

રવિવારની સાંજથી દરોડાનો બંદોબસ્ત કરી દેવાયો હતો
ઇન્વેસ્ટિગેશન વિંગ દ્વારા ફરી એકવાર સોમવારના રોજ દરોડા પાડયા હતા. રવિવારની સાંજથી દરોડાનો બંદોબસ્ત કરી દેવાયો હતો એટલે અનેક લોકો ઉંઘતા ઝડપાયા હતા. સવારે ટીમ ગોરાટ રોડ પરના ઉમર જનરલના બંગલે પહોંચી હતી. જનરલ ગ્રુપની રીંગરોડ પર આવેલી ઓફિસ, માંડવીની ફેકટરી, ઉપરાંત સ્ટાફના કેટલાંક કર્મચારીઓને ત્યાં પણ તપાસ કરવામાં આવી હતી.

રોકડમાં થયેલાં વ્યવહારો પણ અધિકારીઓએ શોધી રહ્યાં
તપાસ સાથે સંકળાયેલાં અધિકારીઓએ કહ્યુ કે રૂપિયા 300 કરોડના ગ્રુપના ટર્નઓવરમાં મોટાભાગે ટેક્સટાઇલના વ્યવહારો છે. જેમાં નિકાસ મુખ્ય છે તથા લોકલ માર્કેટમાં પણ માલ સપ્યાલ કરવામાં આવે છે. કેટલીક બ્રાન્ડના કપડાં પણ મેન્યુફેકચરિંગ થાય છે. ઉપરાંત નિકાસ કરાયેલાં ડેટા પણ અધિકારીઓ ચકાસી રહ્યા છે. કેટલાંક વ્યવહારો ખાસ કરીને સેલ અને પરચેઝ રોકડમાં થઈ હોવાનું પણ ધ્યાને આવ્યુ છે.