કેનેડાના સૌથી મોટા ટોરોન્ટો ઈન્ટરનેશનલ એરપોર્ટ પર 17 એપ્રિલે મોડી સાંજે એક ખાસ કન્ટેનર પહોંચ્યું હતું. તેમાં 14.8 મિલિયન ડોલર એટલે કે 121 કરોડ રૂપિયાનું સોનું અને અન્ય કિંમતી ચીજવસ્તુઓ હતી. તેને સુરક્ષિત રીતે કાર્ગો સુવિધામાં ખસેડવામાં આવ્યો હતો. ત્યારબાદ ગુરુવારે આ માલની ચોરી થઈ હોવાની માહિતી મળી હતી. ત્યારથી કેનેડિયન પોલીસ તેને શોધવાનો પ્રયાસ કરી રહી છે.

ઈન્સ્પેક્ટરે કહ્યું- આ અનોખો કેસ
સમગ્ર મામલાની તપાસ કરી રહેલા ઈન્સ્પેક્ટર ડુવિસ્ટને આ સમગ્ર મામલાને એકદમ અનોખો ગણાવ્યો છે. જોકે, તેમણે કહ્યું કે જ્યાં સુધી તપાસ પૂરી ન થાય ત્યાં સુધી તેઓ કહી શકશે નહીં કે આ કાર્ગો કઈ કંપનીનો છે અને તે કઈ એરલાઈનમાંથી લાવવામાં આવ્યો હતો અને તેનું વજન કેટલું હતું.

ઈન્સ્પેક્ટરે કહ્યું કે આ કેસમાં હજુ સુધી કોઈની ધરપકડ કરવામાં આવી નથી. પોલીસને શંકા છે કે આ પાછળ કોઈ મોટી ગેંગનો હાથ છે. તે કેનેડામાં છે કે નહીં તે હજુ સુધી જાણી શકાયું નથી. ત્રણ દિવસ બાદ પણ પોલીસને કોઈ મોટો સુરાગ મળી શક્યો નથી.

1952માં ઉડતા પ્લેનમાંથી 14 કરોડનું સોનું ચોરાયું હતું
1952ની વાત છે, જ્યારે એક પ્લેન ટોરોન્ટોથી ઉડાન ભરીને કેનેડાના મોન્ટ્રીયલ વિસ્તારમાં પહોંચ્યું હતું. પ્લેન લેન્ડ થતાની સાથે જ ખબર પડી કે 10 સોનાના બોક્સમાંથી 4 ચોરાઈ ગયા છે. જેની કિંમત તે સમયે 14 કરોડ હતી. માત્ર કેનેડિયનો જ નહીં પણ અમેરિકાના લોકોએ પણ આ મામલે ઘણો રસ લીધો હતો.