ટેસ્લાના સીઈઓ ઈલોન મસ્ક અને મેટા સીઈઓ માર્ક ઝકરબર્ગ વચ્ચેની ફાઈટ સોશિયલ મીડિયા પ્લેટફોર્મ X પર લાઈવ સ્ટ્રીમ કરવામાં આવશે. મસ્કે એક પોસ્ટમાં આ જાણકારી આપી છે. તેમણે કહ્યું, 'આમાંથી થતી આવક વૃદ્ધો માટે દાન કરીશ.'

મસ્કે એ પણ જણાવ્યું કે તેમની પાસે વર્કઆઉટ માટે સમય નથી, તેથી તે કામના સમયે આ ફાઈટની તૈયારી કરી રહ્યા છે. હાલમાં જ તેમણે એક લાઈવ સ્ટ્રીમ પણ કર્યું હતું, જેમાં તે ડમ્બેલ્સ ઉપાડતા જોવા મળ્યા હતા.

ઝકરબર્ગની કંપની મેટાએ ટ્વિટર જેવું પ્લેટફોર્મ લોન્ચ કરવાની વાત કરી હતી. આ પછી ડેઈલી મેલે એક અહેવાલ પ્રકાશિત કર્યો, જેની હેડલાઈન હતી- ટ્વિટરને ખતમ કરવાનો ઝકરબર્ગનો માસ્ટર પ્લાન સામે આવ્યો. આ રિપોર્ટ ટ્વિટર પર શેર થવા લાગ્યો. આવી જ એક પોસ્ટ પર ઈલોન મસ્કે ઝકરબર્ગને ચીડવતી ઈમોજી પોસ્ટ કરી હતી.
ઝકરબર્ગના નવા પ્લેટફોર્મને લગતી વધુ વિગતો મારિયો નાફવાલ નામના ટ્વિટર હેન્ડલથી શેર કરવામાં આવી હતી. ઈલોન મસ્ક પણ નાફવાલને ફોલો કરે છે. તેમાં કહેવામાં આવ્યું છે કે મેટાની નવી એપનું નામ 'થ્રેડ' હોઈ શકે છે. આના પર એક ટ્વિટર યુઝરે લખ્યું- મસ્ક સાવચેત રહો... મેં સાંભળ્યું કે ઝકરબર્ગ હવે જુ-જિત્સુ કરી રહ્યા છે.
અહીંથી કેજ ફાઈટ ચેલેન્જની શરૂઆત થઈ. મસ્કે પોસ્ટ પર જવાબ આપ્યો - હું કેજ ફાઈટ માટે તૈયાર છું. આ પછી ઝકરબર્ગે મસ્કને ફાઈટનું સ્થાન પૂછ્યું અને મસ્કે જવાબ આપ્યો - વેગાસ ઓક્ટાગન.
મસ્ક અને ઝકરબર્ગ વેગાસ ઓક્ટાગનમાં લડશે કે કેમ તે હજુ સ્પષ્ટ નથી. મસ્કની પોસ્ટ પર કોમેન્ટ બોક્સ મીમ્સથી છલકાઈ ગયું છે. એક યુઝરે મસ્કની એક તસવીર પોસ્ટ કરી છે, જેમાં તે હલ્ક જેવો દેખાઈ રહ્યો છે.