G20 સમિટની સમાપ્તિ પછી, UAEના નાયબ વડા પ્રધાન સૈફ બિન જાયદ અલ નાહયાને સમિટનો એક વીડિયો શેર કર્યો. જેમાં ભારત-મિડલ ઇસ્ટ-યુરોપ આર્થિક કોરિડોર (IMEC) સંબંધિત નકશો દેખાય છે. આ નકશામાં UAEએ PoKને ભારતના ભાગ તરીકે દર્શાવ્યું છે.

આ વીડિયોમાં અમેરિકી રાષ્ટ્રપતિ જો બાઇડન UAEના વખાણ કરી રહ્યા છે. તેમનું કહેવું છે કે જો UAE ન હોત તો કદાચ IMEC પ્રોજેક્ટના મામલામાં આજે અમે અહીં સુધી પહોંચી શક્યા ન હોત. આ રાજદ્વારી પગલું ભારત સાથે UAEના મજબૂત સંબંધો દર્શાવે છે. આ ઉપરાંત, તે ભારતની પ્રાદેશિક અખંડિતતાને પણ મજબૂત બનાવે છે.

અગાઉ માર્ચમાં દુબઈના સૌથી મોટા રિયલ એસ્ટેટ ડેવલપર એમાર ગ્રુપે શ્રીનગરમાં એક મોલ પ્રોજેક્ટનો શિલાન્યાસ કર્યું હતું. 10 લાખ સ્ક્વેર ફૂટમાં બનેલો આ મોલ કાશ્મીરમાંથી કલમ 370 હટાવ્યા બાદ પ્રથમ મોટો વિદેશી પ્રોજેક્ટ છે.

UAE એ આરબ દેશોમાંથી એક છે જે પાકિસ્તાનની નજીક છે. તેમની મિત્રતાનો અંદાજ એ વાત પરથી પણ લગાવી શકાય છે કે UAEએ આર્થિક સંકટનો સામનો કરી રહેલા પાકિસ્તાનને તેની અનામત વધારવા માટે 1 બિલિયન યુએસ ડોલરની મદદ કરી હતી.

આ પહેલીવાર નથી, આ પહેલા પણ UAEએ પાકિસ્તાનને લોન આપીને મદદ કરી છે. જો કે, પાકિસ્તાન સાથે સારા સંબંધો હોવા છતાં, UAE કાશ્મીરને લઈને ભારત વિરુદ્ધ કોઈપણ નિવેદન આપવાનું ટાળે છે.

2019માં, જ્યારે ભારતે કાશ્મીરને વિશેષાધિકાર આપતી કલમ 370 નાબૂદ કરી, UAEએ તેને ભારતનો આંતરિક મુદ્દો ગણાવ્યો, જ્યારે પાકિસ્તાન ભારતની આ કાર્યવાહી પર આરબ દેશોની કડક પ્રતિક્રિયાની અપેક્ષા કરી રહ્યું હતું.