સંસદમાં ઘૂસણખોરી કેસના મુખ્ય સૂત્રધાર લલિત મોહન ઝાએ ગુરુવારે મોડી રાત્રે દિલ્હી પોલીસ સ્ટેશનમાં આત્મસમર્પણ કર્યું હતું. પોલીસે લલિતની ધરપકડ કરી હતી. પોલીસ સૂત્રોએ જણાવ્યું હતું કે લલિત એક વ્યક્તિ સાથે દિલ્હીના કર્તવ્ય પથ પોલીસ સ્ટેશન પહોંચ્યો હતો.

પોલીસે જણાવ્યું કે ઘટનાનો વીડિયો બનાવ્યા બાદ લલિત ઘટનાસ્થળેથી ફરાર થઈ ગયો હતો. તેણે તેના તમામ સાથીઓના મોબાઈલ ફોન પણ છીનવી લીધા હતા. લલિત બસ દ્વારા રાજસ્થાનના નાગૌર પહોંચ્યો હતો. ત્યાં તે તેના બે મિત્રોને મળ્યો અને એક હોટલમાં રાત વિતાવી. જ્યારે તેને ખબર પડી કે પોલીસ તેને શોધી રહી છે, ત્યારે તે બસમાં દિલ્હી પાછો આવ્યો અને તેણે આત્મસમર્પણ કર્યું. હાલ તે પોલીસના સ્પેશિયલ સેલની કસ્ટડીમાં છે.

દિલ્હી પોલીસની સ્પેશિયલ ટીમ શનિવાર અથવા રવિવારે સંસદમાં સુરક્ષા ચૂકના સીનને રિક્રિએટ કરશે. સૂત્રોના જણાવ્યા અનુસાર આ માટે તમામ આરોપીઓને સંસદ સંકુલમાં લઈ જવામાં આવશે. આ સાથે દિલ્હી પોલીસ એ શોધી કાઢશે કે આરોપીઓ સંસદભવનમાં કેવી રીતે ઘૂસ્યા અને કેવી રીતે તેમની યોજનાને અંજામ આપ્યો.