રાજકોટ નજીક આવેલ શાપર વેરાવળ મેઈન રોડ, કોરાટ સ્કુલ પાસે ધર્મભક્તિ કોમ્પ્લેક્ષમાં આવેલ સિધ્ધીવિનાયક નામની પાનની દુકાને રૂ.4500ની ઉઘરાણીમાં 22 વર્ષીય યુવાન જયદીપ રાજેશભાઇ મકવાણાની ગઈકાલે છરીના ઘા ઝીંકી હત્યા નીપજાવવામાં આવી હતી. જોકે, આ ઉઘરાણી પણ તેના કાકા પાસે કરવામાં આવતી હતી અને તેમાં કાકાને મારતા હોવાનું જોઈ મૃતક યુવાન તેના કાકાને બચાવવા માટે વચ્ચે પડતા તેને જીવ ગુમાવવાનો વારો આવ્યો હતો. જે ગુનામાં શાપર પોલીસે ગણતરીની કલાકોમાં પાનની દુકાનના સંચાલક યશ મનસુખ સોનગરા, તેના ભાઈ ચિરાગ મનસુખ સોનગરાની ધરપકડ કરી કાયદેસરની કાર્યવાહી હાથ ધરી છે.

રાજકોટના શાપર વેરાવળ ખાતે ગઈકાલે થયેલ હત્યાના ગુનામાં પોલીસે હત્યા તેમજ એટ્રોસિટી એક્ટ સહિતની કલમો હેઠળ ગુનો નોંધી આરોપીઓની શોધખોળ હાથ ધરી હતી. આ તપાસ દરમિયાન આરોપી પાનની દુકાનના સંચાલક યશ મનસુખ સોનગરા તથા તેના ભાઈ ચિરાગ મનસુખ સોનગરા મળી આવતા આજ રોજ પોલીસે ગણતરીની કલાકમાં તેને ઝડપી પાડી કાયદેસરની કાર્યવાહી હાથ ધરી છે. આરોપીની વધુ પુછપરછ કરવા રિમાન્ડ મેળવવા તજવીજ હાથ ધરવામાં આવશે. જેમાં તેની સાથે અન્ય કોઈની સંડોવણી હતી કે કેમ? તેમજ હત્યા નીપજાવી ક્યાં ગયા હતા? સહિતની દિશામાં તપાસ હાથ ધરવામાં આવશે.