સુપ્રીમ કોર્ટે ગયા અઠવાડિયે રાષ્ટ્રપતિ અને રાજ્યપાલોને બિલોને મંજૂરી આપવા માટે સમયમર્યાદા નક્કી કરી હતી. ઉપપ્રમુખ જગદીપ ધનખડે આ અંગે નારાજગી વ્યક્ત કરી છે. તેમણે કહ્યું હતું કે કોર્ટ રાષ્ટ્રપતિને આદેશ આપી શકતી નથી. ઉપરાષ્ટ્રપતિએ કહ્યું- આપણે એવી પરિસ્થિતિ બનાવી શકતા નથી, જ્યાં કોર્ટ રાષ્ટ્રપતિને સૂચના આપે. બંધારણના અનુચ્છેદ 142 હેઠળ કોર્ટને આપવામાં આવેલી વિશેષ સત્તાઓ લોકશાહી શક્તિઓ સામે 24x7 ઉપલબ્ધ પરમાણુ મિસાઇલ બની ગઈ છે.

લોકશાહીમાં ચૂંટાયેલી સરકાર સૌથી મહત્ત્વપૂર્ણ હોય છે અને બધી સંસ્થાઓએ તેમની સંબંધિત મર્યાદામાં કામ કરવું જોઈએ. તેમણે સ્પષ્ટપણે કહ્યું હતું કે કોઈપણ સંસ્થા બંધારણથી પર નથી.

સુપ્રીમ કોર્ટે કહ્યું હતું કે રાષ્ટ્રપતિએ રાજ્યપાલ દ્વારા મોકલવામાં આવેલા બિલ પર 3 મહિનાની અંદર નિર્ણય લેવો પડશે. 8 એપ્રિલના રોજ સુપ્રીમ કોર્ટે તામિલનાડુ સરકાર અને રાજ્યપાલના કેસમાં ઐતિહાસિક નિર્ણય લીધો હતો. કોર્ટે કહ્યું હતું કે રાજ્યપાલે એક મહિનાની અંદર વિધાનસભા દ્વારા મોકલવામાં આવેલા બિલ પર નિર્ણય લેવો પડશે.