અનિશ્ચિત આર્થિક દૃષ્ટિકોણને ધ્યાનમાં રાખીને વિશ્વભરની કંપનીઓ વધારાના ખર્ચમાં ઘટાડો કરી રહી છે. આ કારણે ભારતીય આઈટી સેક્ટર મુશ્કેલ ત્રિમાસીક ક્વાર્ટર અને એક વર્ષ આગળની તૈયારી કરી રહ્યું છે. IT સેક્ટરની ઘણી કંપનીઓ ચાલુ નાણાકીય વર્ષ 2023-24ના પ્રથમ ક્વાર્ટરમાં નબળી કમાણીનું રિપોર્ટ કાર્ડ રજૂ કરી શકે છે.પરંતુ મધ્યમ કદની આઇટી કંપનીઓ જેમ કે L&T ટેક્નોલોજી સર્વિસિસ, પર્સિસ્ટન્ટ સિસ્ટમ્સ અને કોફોર્જ મોટી IT કંપનીઓ કરતાં વધુ સારી આવક વૃદ્ધિ દર્શાવે તેવી અપેક્ષા છે.

દેશની સૌથી મોટી આઇટી કંપની ટીસીએસ અને ત્રીજી સૌથી મોટી આઇટી કંપની એચસીએલ ટેક 12 જુલાઈએ તેમના ત્રિમાસિક પરિણામો રજૂ કરશે. ટીસીએસ અને ઇન્ફોસીસની આવક વૃદ્ધિ એપ્રિલ-જૂનમાં ત્રિમાસિક ધોરણે સ્થિર રહેવાની ધારણા છે. જ્યારે વિપ્રોની આવક વૃદ્ધિમાં ઘટાડો જોવા મળી શકે છે. બીજી તરફ, મિડકેપ આઇટી સેગમેન્ટમાં, સાયન્ટ અને એમફેસિસને બાદ કરતાં, બાકીની કંપનીઓ આવક વૃદ્ધિમાં સારી વૃદ્ધિ દર્શાવે તેવી અપેક્ષા છે.વિવિધ બ્રોકરેજ હાઉસે તેમના રિપોર્ટમાં આ અંદાજ વ્યક્ત કર્યો છે. એપ્રિલ-જૂન ક્વાર્ટર માટે ત્રિમાસિક નાણાકીય પરિણામોની સિઝન 12 જુલાઈથી શરૂ થવા જઈ રહી છે.