પ્રધાનમંત્રી મોદીએ રાષ્ટ્રપતિ વ્લાદિમીર પુતિન સાથેની મુલાકાત દરમિયાન રશિયન સૈન્યમાં સેવા આપતા ભારતીયોનો મુદ્દો ઉઠાવ્યો હતો. તેમણે પુતિનને તેમની સલામત વાપસી સુનિશ્ચિત કરવા વિનંતી કરી હતી. વિદેશ મંત્રાલયના જણાવ્યા અનુસાર, રશિયન સૈન્યમાં ઓછામાં ઓછા 44 ભારતીયો ફસાયેલા છે.

ભારતની મુલાકાતે આવેલા પુતિન અને મોદી લગભગ 24 કલાકમાં 4 વખત મળ્યા હતા. બંને નેતાઓએ સાથે પ્રાઈવેટ ડિનર, દ્વિપક્ષીય બેઠક, સંયુક્ત પત્રકાર પરિષદ અને ભારત-રશિયા વ્યાપાર મંચને સંબોધન કર્યું હતું.

જોકે, આ સમયગાળા દરમિયાન બંને દેશો વચ્ચે કોઈ મોટા સંરક્ષણ સોદાની જાહેરાત કરવામાં આવી ન હતી. અગાઉ, ઘણા અહેવાલોમાં ભારત અને રશિયા વચ્ચે ફાઇટર જેટ અથવા મોટા સંરક્ષણ સોદાની દરખાસ્ત કરવામાં આવી હતી.

ભારત-રશિયા વચ્ચે 19 સમજૂતીઓ પર મહોર લાગી છે. આનો હેતુ ભારત-રશિયા વેપાર વધારવાનો છે. ભારત-રશિયા વચ્ચે જહાજ નિર્માણ, ભારતીય નાવિકોને બર્ફીલા સમુદ્રી વિસ્તારોમાં જહાજ ચલાવવાની તાલીમ, નવી શિપિંગ લેન પર રોકાણ, સિવિલ ન્યુક્લિયર ઊર્જા અને મહત્ત્વપૂર્ણ ખનિજો પર કરારો અને MoU પર હસ્તાક્ષર કરવામાં આવ્યા.