બાંગ્લાદેશનાં પૂર્વ વડાપ્રધાન ખાલિદા ઝિયાના પુત્ર તારિક રહેમાન 17 વર્ષ બાદ સ્વદેશ પરત ફર્યા છે. તેઓ ધરપકડથી બચવા માટે વર્ષ 2008માં લંડન ભાગી ગયા હતા. તે સમયે શેખ હસીનાની સરકારમાં તેમની વિરુદ્ધ ભ્રષ્ટાચારના અનેક કેસ ચાલી રહ્યા હતા.

આજે તારિકના સ્વાગત માટે તેમની પાર્ટી BNP (બાંગ્લાદેશ નેશનાલિસ્ટ પાર્ટી)ના 1 લાખથી વધુ કાર્યકર્તાઓ ઉમટી પડ્યા હતા. ઢાકા એરપોર્ટથી લઈને 300 ફીટ રોડ સુધી ભવ્ય રોડ શો યોજાયો હતો. આ 13 કિલોમીટર લાંબો રસ્તો પસાર કરવામાં તેમને અંદાજે 3 કલાક જેટલો સમય લાગ્યો હતો.

300 ફીટ રોડ પર તારિક રહેમાને 17 મિનિટ સુધી ભાષણ આપ્યું હતું. આ દરમિયાન તેમણે કહ્યું કે, "અમે દેશમાં શાંતિ સ્થાપિત કરીશું અને નવું બાંગ્લાદેશ બનાવીશું." જોકે, આશ્ચર્યની વાત એ રહી કે તેમણે પોતાના સંબોધનમાં શેખ હસીના વિશે એક પણ શબ્દ ઉચ્ચાર્યો નહોતો.

બાંગ્લાદેશમાં આગામી વર્ષે 12 ફેબ્રુઆરીએ સામાન્ય ચૂંટણીઓ યોજાવાની છે. ખાલિદા ઝિયાની નાદુરસ્ત તબિયતને કારણે એવું માનવામાં આવી રહ્યું છે કે તારિક રહેમાન આગામી વડાપ્રધાન પદના પ્રબળ દાવેદાર બની શકે છે.