જાપાનમાં પીએમ સાને તાકાઇચીએ સંસદમાં મહિલાઓ માટે વધુ શૌચાલય બનાવવાની માંગ કરી છે. તેમની સાથે લગભગ 60 મહિલા સાંસદોએ પણ આ અંગે એક અરજી આપી છે.

અરજીમાં કહેવામાં આવ્યું છે કે સંસદમાં મહિલાઓની સંખ્યા વધી છે, પરંતુ તે મુજબ સુવિધાઓ મળી રહી નથી. હાલમાં સંસદના નીચલા ગૃહમાં 73 મહિલા સાંસદો છે પરંતુ તેમના માટે માત્ર 1 શૌચાલય છે.

વિપક્ષી ડેમોક્રેટિક પાર્ટીના સાંસદ યાસુકો કોમિયામાએ કહ્યું કે સંસદ સત્ર દરમિયાન મહિલા સાંસદોને શૌચાલયની બહાર લાંબી લાઇનમાં ઊભા રહેવું પડે છે.

જાપાનની સંસદ (ડાયટ)ની ઇમારત 1936માં બની હતી. ત્યારે દેશમાં મહિલાઓને મત આપવાનો પણ અધિકાર મળ્યો ન હતો.

બીજા વિશ્વયુદ્ધમાં જાપાનની હાર પછી ડિસેમ્બર 1945માં મહિલાઓને મત આપવાનો અધિકાર મળ્યો. એક વર્ષ પછી 1946માં થયેલી ચૂંટણીમાં જાપાનમાં મહિલાઓ સંસદ માટે ચૂંટાઈને આવી.

જાપાનના અખબાર યોમિયુરી શિમ્બુન અનુસાર સંસદના નીચલા ગૃહની ઇમારતમાં પુરુષો માટે 12 શૌચાલય (67 સ્ટૉલ) છે, જ્યારે મહિલાઓ માટે ફક્ત 9 શૌચાલય છે, જેમાં કુલ 22 ક્યુબિકલ છે.

મુખ્ય પ્લેનરી સેશન હૉલ જ્યાં સંસદની કાર્યવાહી થાય છે, ત્યાં મહિલાઓ માટે ફક્ત 1 શૌચાલય છે. સેશન શરૂ થતા પહેલા ઘણી વાર લાઇન એટલી વધી જાય છે કે મહિલા સાંસદોને બિલ્ડિંગના બીજા ભાગમાં બાથરૂમ માટે જવું પડે છે.

જ્યારે, પુરુષ સાંસદો માટે ઘણા શૌચાલય નજીક-નજીક છે. તેમને આવી મુશ્કેલીમાંથી પસાર થવું પડતું નથી.