કેપિટલ માર્કેટ નિયામક સેબીએ વિદેશી પોર્ટફોલિયો રોકાણકારો માટેના ધોરણોને વધુ કડક બનાવતા તેઓને કોઇપણ પ્રકારના માળખા અથવા માલિકીને લઇને કરાયેલા ફેરફારની સાત કામકાજના દિવસમાં જાણ કરવાનો નિર્દેશ આપ્યો છે. નોટિફિકેશન અનુસાર, નવા એફપીઆઇની નોંધણીના સંદર્ભે સેબી જરૂર પડે તો તેઓ પાસેથી વધારાના ડોક્યુમેન્ટ્સ માંગી શકે છે.

નવા નિયમો હેઠળ, વિદેશી પોર્ટફોલિયો રોકાણકારોએ સામગ્રીમાં, માળખામાં તેમજ સંચાલનને લગતા ફેરફાર અંગેની કોઇપણ ગેરમાર્ગે દોરતી માહિતી અથવા ખોટી માહિતી અંગે સેબી અને ડિપોઝિટરીને કામકાજના સાત દિવસની અંદર જાણ કરવાની રહેશે. તદુપરાંત, વિદેશી પોર્ટફોલિયો રોકાણકારોએ જો તેમની વિરુદ્ધ કોઇપણ પ્રકારનો દંડ, કાર્યવાહી, તપાસનું નિષ્કર્ષ હોય જેના માટે કાર્યવાહી કરવામાં આવી હોય અથવા તો વિદેશી નિયામક દ્વારા તેમની સામે કોઇ કાર્યવાહી થવાની હોય તો તે અંગે પણ કામકાજના સાત દિવસની અંદર જાણ કરવાનો નિર્દેશ કરવામાં આવ્યો છે.