ભારતે બીજી ટેસ્ટમાં સાઉથ આફ્રિકાને 7 વિકેટે હરાવ્યું હતું. બંને ટીમ 4 ઇનિંગ્સ સહિત માત્ર 107 ઓવરની જ બેટિંગ કરી શકી હતી. 147 વર્ષના ટેસ્ટ ઈતિહાસમાં આ સૌથી ટૂંકી મેચ હતી, જેનું પરિણામ માત્ર 2 દિવસમાં આવ્યું. રોહિત શર્મા સાઉથ આફ્રિકામાં ટેસ્ટ મેચ જીતનાર ચોથો ભારતીય કેપ્ટન બન્યો છે.

ગુરુવારે કેપટાઉનમાં સાઉથ આફ્રિકાએ ટૉસ જીતીને પ્રથમ બેટિંગ કરવાનું પસંદ કર્યું હતું, પરંતુ ટીમ 55 રનમાં ઓલઆઉટ થઈ ગઈ હતી. ભારત પણ તેના પ્રથમ દાવમાં માત્ર 153 રન જ બનાવી શક્યું હતું, જોકે ટીમને 98 રનની લીડ મળી હતી.

સાઉથ આફ્રિકા તેની બીજી ઇનિંગમાં માત્ર 176 રન જ બનાવી શકી હતી. ટીમ 78 રનથી આગળ હતી, જેથી ભારતને 79 રનનો ટાર્ગેટ મળ્યો હતો. ટીમ ઈન્ડિયાએ બીજા સેશનની માત્ર 12 ઓવરમાં 3 વિકેટ ગુમાવીને આ ટાર્ગેટ ચેઝ કર્યો હતો.

ઓવરોની દ્રષ્ટિએ સૌથી ટૂંકી ટેસ્ટ
આ ઈતિહાસની સૌથી ટૂંકી ટેસ્ટ મેચ હતી જે ઓવર ફેંકવામાં આવી હતી, જેમાં પરિણામ આવ્યું હતું. સાઉથ આફ્રિકાએ કેપટાઉન ટેસ્ટમાં 60.1 ઓવર (36.5 અને 23.2) બેટિંગ કરી હતી. જ્યારે ભારતે 46.5 (34.5 અને 12) ઓવરની બેટિંગ કરી હતી. એટલે કે મેચ 107 ઓવરમાં જ ખતમ થઈ ગઈ.

આ પહેલાં સૌથી ટૂંકી ટેસ્ટનો રેકોર્ડ 1932માં બન્યો હતો. ત્યારે મેલબોર્નમાં સાઉથ આફ્રિકા અને ઓસ્ટ્રેલિયા વચ્ચેની ટેસ્ટ માત્ર 109.2 ઓવર ચાલી હતી. આ મેચમાં 656 બોલ ફેંકવામાં આવ્યા હતા, જેને ઓસ્ટ્રેલિયાએ એક ઇનિંગ અને 72 રને જીતી હતી. જ્યારે ભારત અને સાઉથ આફ્રિકા વચ્ચેની મેચમાં માત્ર 642 બોલ ફેંકાયા હતા.