દેશમાં ક્રૂડનું આયાત બિલ ચાલુ નાણાકીય વર્ષ દરમિયાન વધીને $101-104 અબજ પર પહોંચી શકે છે જે વર્ષ 2023-24 દરમિયાન $96.1 અબજ નોંધાયું હતું અને ઇઝરાયલ-ઇરાન વચ્ચે તણાવમાં વધારો થશે તો તેનાથી પણ આયાતના મૂલ્ય પર દબાણ ઉભુ થવાની સંભાવના પણ રેટિંગ એજન્સી ઇકરા દ્વારા વ્યક્ત કરવામાં આવી છે. રેટિંગ એજન્સીએ જણાવ્યું હતું કે વિશ્લેષણના આધારે, રશિયાથી ઓછી કિંમતે ઓઇલની આયાતને કારણે છેલ્લા 11 મહિનામાં $7.9 અબજની (એપ્રિલ-ફેબ્રુઆરી) બચત થઇ હતી, જે વર્ષ 2022-23 દરમિયાન $5.1 અબજ હતી.

ભારતની ઓઇલ પરની આયાત પરની નિર્ભરતા વધુ રહેવાની સાથે જ જો રશિયન ક્રૂડની ખરીદી પર ડિસ્કાઉન્ટ યથાવત્ રહેશે તો દેશનું ઇમ્પોર્ટ બિલ નાણાકીય વર્ષ 2025 દરમિયાન વધીને $101-104 અબજ થઇ શકે છે, જે FY 2024માં $96.1 અબજ હતી.

ઇકરાની ગણતરી અનુસાર, ચાલુ વર્ષ દરમિયાન ક્રૂડની સરેરાશ કિંમતમાં બેરલ દીઠ $10ના વધારાથી ઓઇલની આયાત $12-13 અબજ પર પહોંચી શકે છે, જેને કારણે ચાલુ ખાતાની ખાધમાં પણ 0.3%નો વધારો થશે. તે ઉપરાંત જો નાણાકીય વર્ષ 2025 દરમિયાન સરેરાશ ક્રૂડ ઓઇલની કિંમત બેરલ દીઠ $95 અબજ પર પહોંચે તો ચાલુ ખાતાની ખાધ વધીને જીડીપીના 1.5% પર પહોંચી શકે છે. જેનો વર્ષ 2024-25 માટેનો અંદાજ 1.2% છે.

ભારત તેની ક્રૂડ ઓઇલની 85% આયાત કરે છે. એપ્રિલ-ફેબ્રુઆરીમાં દેશની પેટ્રોલિયમ ક્રૂડ અને પ્રોડક્ટ્સની આયાતના મૂલ્યમાં 15.2%નો ઘટાડો જોવા મળ્યો હતો. વોલ્યૂમમાં પણ આંશિક વધારો નોંધાયો હતો. વોલ્યૂમની દૃષ્ટિએ, રશિયાથી આયાત કરવામાં આવેલા ક્રૂડ પેટ્રોલિયમનો હિસ્સો નાણાકીય વર્ષ 2024ના એપ્રિલ-ફેબ્રુઆરી દરમિયાન વધીને 36% થયો હતો.