ગુજરાત વિધાનસભાની ચૂંટણી જાહેર થાય તે પહેલાં રાજ્ય સરકારની આજે અંતિમ કેબિનેટની બેઠક યોજાશે. આ બેઠકમાં ચૂંટણીલક્ષી મોટી જાહેરાત થવાની શક્યતાઓ છે. બીજી તરફ આવતીકાલથી વડાપ્રધાન મોદી ગુજરાત આવી રહ્યાં છે. તેમના પ્રવાસને લઈને પણ આ બેઠકમાં ચર્ચાઓ થઈ શકે છે. વિવિધ સરકારી કાર્યક્રમો અને તેની રૂપરેખાને લઈને પણ કેબિનેટ બેઠકમાં ચર્ચા કરવામાં આવી શકે છે.

રાજ્ય સરકારે રૂ. 630 કરોડનું પેકેજ જાહેર કરીને ખેડૂત મતોનો પાક લણવાનો પ્રયાસ કર્યો છે. અતિવૃષ્ટીના કારણે અનેક વિસ્તારના ખેડૂતોનો પાક નાશ થઇ ચૂક્યો તેને મહિનાઓ વીતી ચૂક્યા છે, ચોમાસાની ઋતુ પણ પૂર્ણ થઇ ચૂકી છે, સહાય માગ કરતા પણ ખેડૂતો થાક્યા હતા, ત્યારે છેલ્લે છેલ્લે ખેડૂતોને રીઝવવા માટે સરકારે સહાય પેકેજ જાહેર કરી દીધું છે. 'ચૂંટણી પહેલાં મુખ્યમંત્રી ભૂપેન્દ્ર પટેલે રાજ્યના 8 લાખથી વધુ ખેડૂતોને આકર્ષવા માટે જાહેરાત કરી દીધી છે. જોકે જુલાઈમાં કૃષિમંત્રીએ આશ્વાસન રૂપે સહાય આપશે તેવું જણાવ્યું હતું.