દેશમાં વેચાતા દરેક ટુ-વ્હીલર સાથે હવે કંપનીઓએ ISI-પ્રમાણિત 2 હેલ્મેટ આપવાના રહેશે. કેન્દ્રીય માર્ગ પરિવહન અને રાજમાર્ગ મંત્રી નિતિન ગડકરીએ નવી દિલ્હીમાં આયોજિત એક ઓટો સમિટમાં આ અંગે જાહેરાત કરી હતી.

તેમણે કહ્યું કે, લોકોની સુરક્ષા માટે આ જરૂરી છે. ટુ-વ્હીલર હેલ્મેટ મેન્યુફેક્ચરર્સ એસોસિએશન ઓફ ઈન્ડિયા (THMA) દ્વારા આને સમર્થન આપવામાં આવ્યું છે. THMA ઘણા સમયથી આ માંગણી કરી રહ્યું છે.

ભારતમાં દર વર્ષે 4,80,000થી વધુ માર્ગ અકસ્માતો થાય છે અને તેમાં લગભગ 1,88,000થી વધુ લોકોના મોત થાય છે. આમાંથી, 66% મૃતકો 18 થી 45 વર્ષની વયના હોય છે. ખાસ કરીને, ટુ-વ્હીલર અકસ્માતોમાં દર વર્ષે 69,000થી વધુ લોકો મૃત્યુ પામે છે, જેમાંથી 50% મોત હેલ્મેટ ન પહેરવાને કારણે થાય છે.