BCCI હજુ પણ RITના દાયરામાં આવશે નહીં. રમતગમત મંત્રાલયે નેશનલ સ્પોર્ટ્સ ગવર્નન્સ બિલમાં સુધારો કર્યો છે. આ મુજબ, હવે ફક્ત તે રમતગમત સંગઠનોને તેના કાર્યક્ષેત્રમાં લાવવામાં આવ્યા છે, જે સરકારી અનુદાન અને સહાય લે છે.

BCCI રમત મંત્રાલય પાસેથી કોઈ ગ્રાન્ટ લેતું નથી. જોકે, વિવિધ સંગઠનો ઘણી વખત BCCIને RTI (માહિતી અધિકાર)ના દાયરામાં લાવવાની માગ કરી રહ્યા છે.

રમતગમત મંત્રી મનસુખ માંડવિયાએ 23 જુલાઈના રોજ લોકસભામાં નેશનલ સ્પોર્ટ્સ ગવર્નન્સ બિલ, 2025 રજૂ કર્યું. આ બિલમાં રમતગમતના વિકાસ માટે નેશનલ સ્પોર્ટ્સ ગવર્નન્સ સંસ્થા, રાષ્ટ્રીય રમતગમત બોર્ડ, રાષ્ટ્રીય રમતગમત ચૂંટણી પેનલ અને રાષ્ટ્રીય રમતગમત ટ્રિબ્યુનલ બનાવવાની જોગવાઈઓ છે. સંસદમાં આ બિલને GPCમાં મોકલવાની માગ પણ કરવામાં આવી છે.

ગયા મહિને લોકસભામાં રજૂ કરાયેલા બિલના કલમ 15(2)માં કહેવામાં આવ્યું હતું કે કોઈપણ માન્યતા પ્રાપ્ત રમતગમત સંગઠનને માહિતી અધિકાર (RTI) અધિનિયમ, 2005 હેઠળ, આ અધિનિયમ હેઠળ તેના કાર્યો, ફરજો અને સત્તાઓના ઉપયોગના સંદર્ભમાં જાહેર સત્તા માનવામાં આવશે.

બદલાયેલી જોગવાઈમાં જણાવાયું છે કે ફક્ત તે જ સંસ્થાઓ RTIના દાયરામાં આવશે, જે સરકાર પાસેથી ભંડોળ અથવા મદદ લે છે. હવે RTI ફક્ત સરકારી ભંડોળ પર ચાલતી સંસ્થાઓ પર જ લાગુ થશે. આનો અર્થ એ થયો કે BCCI હવે RTIના દાયરામાં નહીં આવે. મંત્રાલયના એક સૂત્રએ જણાવ્યું હતું કે સરકારી મદદ ફક્ત પૈસા સુધી મર્યાદિત નથી. જો કોઈ રમતગમત સંગઠનને ઇવેન્ટ્સનું આયોજન કરવા માટે માળખાગત સુવિધા અથવા અન્ય કોઈ સુવિધા મળે છે, તો તેને પણ RTI હેઠળ લાવી શકાય છે.