OTT પ્લેટફોર્મ નેટફ્લિક્સે વોર્નર બ્રધર્સ સ્ટુડિયોને 72 બિલિયન ડોલર એટલે કે 6.47 લાખ કરોડ રૂપિયામાં ખરીદવાની જાહેરાત કરી છે. આ ડીલ એન્ટરટેઈનમેન્ટ ઈન્ડસ્ટ્રીમાં એક મોટું મર્જર છે, જે સ્ટ્રીમિંગ અને ટ્રેડિશનલ મીડિયાને જોડશે.

કંપનીના જણાવ્યા અનુસાર, આ ખરીદી તેમની કન્ટેન્ટને વધુ મજબૂત બનાવશે. નેટફ્લિક્સના CEO ટેડ સારન્ડોસે કહ્યું, 'આ ડીલ અમારી વૃદ્ધિને નવી ઊંચાઈ આપશે. વોર્નરની ફિલ્મો અને શો અમારી લાઇબ્રેરીનો ભાગ બનશે, જેનાથી યુઝર્સને વધુ વિકલ્પો મળશે.'

આ જાહેરાત ગુરુવારે કંપનીની બોર્ડ મીટિંગ પછી કરવામાં આવી હતી. ડીલ હેઠળ નેટફ્લિક્સ, વોર્નર બ્રધર્સ ડિસ્કવરી (WBD)ના ફિલ્મ-ટીવી સ્ટુડિયો અને સ્ટ્રીમિંગ પ્લેટફોર્મ (HBO Max અને HBO)ને પોતાની સાથે ભેળવશે.

નેટફ્લિક્સ રોકડ અને સ્ટોકથી વોર્નર બ્રધર્સને પેમેન્ટ કરશે

આ ડીલ 72 બિલિયન ડોલરની છે, જેમાં મોટાભાગનું પેમેન્ટ રોકડમાં થશે અને બાકીનું નેટફ્લિક્સના શેર દ્વારા પણ ચૂકવવામાં આવશે. વોર્નર બ્રધર્સ ડિસ્કવરીનો એક ભાગ છે, જે પહેલાથી જ ઘણા બિડર્સના ધ્યાનમાં હતું. રિપોર્ટ્સ અનુસાર, ડિઝની અને એમેઝોને પણ બિડ લગાવી હતી, પરંતુ નેટફ્લિક્સે સૌથી ઊંચી બોલી લગાવી.

આ ડીલ આવતા વર્ષના પ્રથમ ક્વાર્ટરમાં પૂર્ણ થવાની અપેક્ષા છે, જો રેગ્યુલેટરી મંજૂરી મળી જાય તો. નેટફ્લિક્સ પાસે હાલમાં વિશ્વભરમાં 30 કરોડ સબ્સ્ક્રાઇબર્સ છે, જ્યારે વોર્નર બ્રધર્સ 13 કરોડથી વધુ યુઝર્સને સેવા આપે છે. આ મર્જર બંનેના દર્શકોને એક પ્લેટફોર્મ પર લાવશે.