2023માં માત્ર શેરનું મૂલ્ય જ રેકોર્ડ સ્તરે પહોંચ્યું એટલું જ નહીં, અબજોપતિઓ એટલે કે $1 બિલિયન (8,300 કરોડ રૂપિયા)થી વધુની સંપત્તિ ધરાવતી દેશની લિસ્ટેડ કંપનીઓના પ્રમોટર્સની સંખ્યા પણ 21% વધીને 152ના રેકોર્ડ સ્તરે પહોંચી ગઈ છે. તેમની કુલ સંપત્તિ વર્ષ 2022ની તુલનામાં 16.2% વધીને $858.3 બિલિયન (આશરે રૂ. 71.5 લાખ કરોડ) થઈ ગઈ છે.

આ ગણતરી તેમના પરિવારની કંપનીઓમાં હિસ્સેદારીના બજાર મૂલ્ય અનુસાર કરવામાં આવી છે. 2022માં 126 અબજોપતિ પ્રમોટર્સ હતા, જેમની કુલ સંપત્તિ $739 બિલિયન (આશરે રૂ. 61.6 લાખ કરોડ) હતી. આ સમયગાળા દરમિયાન પરિવારની માલિકીની તમામ કંપનીઓના પ્રમોટરોની સંપત્તિમાં 15.5%નો વધારો થયો છે.નેટવર્થની દ્રષ્ટિએ મુકેશ અંબાણી દેશના સૌથી ધનિક પ્રમોટર છે.

2023માં તેમની સંપત્તિ વાર્ષિક ધોરણે 4.7% વધીને 9.28 લાખ કરોડ રૂપિયા થઈ ગઈ છે. બીજા સૌથી ધનિક પ્રમોટર ગૌતમ અદાણીની સંપત્તિમાં ગયા વર્ષે 28.7 ટકાનો ઘટાડો થયો હતો. જો કે, શિવ નાદરની સંપત્તિમાં 34.9%નો વધારો થયો અને તેણે રાધાકૃષ્ણ દામાણીને પાછળ છોડીને સૌથી ધનિક પ્રમોટર્સની યાદીમાં ત્રીજા સ્થાને પહોંચ્યા. ગયા વર્ષે દમાણીની સંપત્તિમાં 4.3%નો ઘટાડો થયો હતો. અબજોપતિ પ્રમોટર્સની યાદીમાં ટોચના 10માં સામેલ સજ્જન જિંદાલની સંપત્તિમાં 55.4%નો વધારો થયો છે.