દેશમાં બીજા ક્વાર્ટર દરમિયાન ગ્રામ્ય વિસ્તારોમાં મંદી અને રિટેલ ફુગાવાને કારણે FMCG સેક્ટરને અનેક પ્રકારના પડકારોનો સામનો કરવો પડ્યો છે પરંતુ આ વર્ષના બીજા છ મહિના દરમિયાન માંગમાં રિકવરી જોવા મળે તેવો આશાવાદ નિષ્ણાંતો વ્યક્ત કરી રહ્યા છે.

મેરિકો, ગોદરેજ કન્ઝ્યુમર પ્રોડક્ટ્સ લિમિટેડ (GCPL) અને ડાબરે તેની ક્વાર્ટરલી અપડેટમાં જણાવ્યું હતું કે બીજા ક્વાર્ટર દરમિયાન સતત વધેલા ફુગાવાને કારણે સર્જાયેલા દબાણને પરિણામે માંગમાં નરમાઇ જોવા મળી હતી. પરંતુ, ચાલુ નાણાકીય વર્ષના બાકીના બે ક્વાર્ટર દરમિયાન ફુગાવામાં ઘટાડો તેમજ તહેવારોની સીઝનને કારણે વપરાશ વૃદ્વિને વેગ મળશે તેવી કંપનીઓ અપેક્ષા સેવે છે.

કોમોડિટીની કિંમતોમાં ઘટાડાથી ફુગાવા પરના દબાણમાં નરમાઇ તેમજ સામાન્ય ચોમાસા જેવા સકારાત્મક પરિબળોના જોરે વર્ષના બીજા છ મહિના દરમિયાન વપરાશ ફરીથી ટ્રેક પર જોવા મળશે તેવું GCPLએ ક્વાર્ટરલી અપડેટમાં જણાવ્યું હતું.

3 વર્ષનો CAGR સિંગલ ડિજીટમાં રહ્યો હતો. દેશમાં ગત ક્વાર્ટરની માફક જ આ ક્વાર્ટર દરમિયાન પણ માંગનું સેન્ટિમેન્ટ સમાન રહ્યું હતું. ગત મહિને રિટેલ ફુગાવો સ્થિર રહેવાને કારણે તેમજ ગ્રામ્ય વિસ્તારોમાં ડાઉનટ્રેડિંગને કારણે કેટલાક અંશે સકારાત્મકના સંકેતો મળ્યા હતા.