વૈશ્વિક સ્તરે સતત બદલાયેલા સંજોગોમાં મ્યુચ્યુઅલ ફંડના સંચાલકોએ તેમની રોકાણ વ્યૂહરચના બદલી છે. સપ્ટેમ્બરમાં તેમણે પાવર, રિટેલ અને કેપિટલ ગુડ્સ સેક્ટરના શેર્સમાં રોકાણ વધાર્યું હતું. તેનાથી વિપરીત, બેંકિંગ, ફાઇનાન્સ અને બાંધકામ સામગ્રી જેવા ક્ષેત્રોમાં રોકાણ ઘટ્યું છે. સામાન્ય રોકાણકારો પણ આમાંથી સંકેતો લઈ શકે છે કે આગામી સમયમાં હવે ક્યા સેક્ટરનો ટ્રેન્ડ રહેશે અને શેમાં રોકાણ કરવાથી વધુ ફાયદો મળી શકે.

મ્યુચ્યુઅલ ફંડ નિષ્ણાતોના મતે, કોઈપણ સેક્ટર હંમેશ માટે સારું પ્રદર્શન કરતું નથી. દરેક સેક્ટર અને થીમ સારા પ્રદર્શનનું ચક્ર ધરાવે છે. મ્યુચ્યુઅલ ફંડ મેનેજરો આ ચક્ર અનુસાર તેમની વ્યૂહરચના બદલતા રહે છે. ઉદાહરણ તરીકે ગયા મહિને તેણે પાવર સેક્ટરની કંપનીઓમાં સૌથી વધુ હોલ્ડિંગ 0.70% વધાર્યું. બીજી તરફ બેન્કિંગ શેર્સમાં સૌથી વધુ 3.36% હોલ્ડિંગ ઘટાડ્યું છે. ઇક્વિટી મ્યુચ્યુઅલ ફંડ્સમાં સપ્ટેમ્બર દરમિયાન રૂ.34,419 કરોડનું રોકાણ જોવા મળ્યું હતું, જેમાં ગત મહિના કરતાં 10%નો ઘટાડો જોવા મળ્યો છે.

ખાસ કરીને થીમેટિક ફંડ્સ તેમજ લાર્જકેપમાં ઘટાડાને પગલે તેમાં ઘટાડો નોંધાયો છે. જ્યારે SIP પણ રૂ.24,509 કરોડના ઉચ્ચ સ્તરે પહોંચી હતી. તે એપ્રિલ બાદ સૌથી નીચલા સ્તરે રહ્યું હતું જ્યારે ઇક્વિટી સ્કીમમાં રૂ.18,917 કરોડનું રોકાણ નોંધાયું હતું. એસોસિએશન ઑફ મ્યુચ્યુઅલ ફંડ્સ ઇન ઇન્ડિયાના ડેટા અનુસાર સપ્ટેમ્બર દરમિયાન રોકાણમાં ઘટાડો છતાં, સતત 43માં મહિને ઇક્વિટી આધારિત ફંડ્સમાં રોકડનો પ્રવાહ નોંધાયો છે.