ચેમ્પિયન્સ ટ્રોફીની આઠમી મેચમાં અફઘાનિસ્તાને ઇંગ્લેન્ડને 8 રને હરાવ્યું છે. છેલ્લી ઓવરમાં અઝમતુલ્લાહ ઓમરઝાઈએ 13 રન ડિફેન્ડ કર્યા. બુધવારે, 326 રનના ટાર્ગેટ ચેઝ કરતી ઇંગ્લેન્ડની ટીમ 49.5 ઓવરમાં 317 રનમાં ઓલઆઉટ થઈ ગઈ હતી. આ સાથે, ઇંગ્લેન્ડ આ ટુર્નામેન્ટમાંથી બહાર થઈ ગયું છે.

લાહોરના ગદ્દાફી સ્ટેડિયમમાં અફઘાનિસ્તાને ટૉસ જીતીને બેટિંગ કરવાનો નિર્ણય લીધો. ટીમે ઇબ્રાહિમ ઝદરાનની સદીના આધારે 7 વિકેટ ગુમાવીને 325 રન બનાવ્યા. ઝદરાને 146 બોલમાં 177 રનની ઇનિંગ રમી. જેમાં 12 ચોગ્ગા અને 6 છગ્ગાનો સમાવેશ થતો હતો. ઝદરાન આ ટુર્નામેન્ટમાં સૌથી વધુ વ્યક્તિગત સ્કોર બનાવનાર બેટર બન્યો છે.

ઇંગ્લિશ ટીમ માટે જો રૂટે 120 રનની ઇનિંગ રમી હતી. બેન ડકેટ અને જોસ બટલરે 38-38 રન બનાવ્યા. જેમી ઓવરટન ફક્ત 32 રન બનાવી શક્યો. અફઘાનિસ્તાન તરફથી ઓમરઝાઈએ 5 વિકેટ લીધી. મોહમ્મદ નબીએ 2 વિકેટ લીધી.

ગ્રૂપ-Bમાં 4 ટીમ છે; ઓસ્ટ્રેલિયા, સાઉથ આફ્રિકા, અફઘાનિસ્તાન અને ઇંગ્લેન્ડ. એક ગ્રૂપમાંથી ફક્ત 2 ટીમ સેમિફાઈનલમાં પહોંચી શકે છે. બધી ટીમના 2-2 મેચ રમ્યા પછી, સાઉથ આફ્રિકા અને ઓસ્ટ્રેલિયા 3-3 પોઈન્ટ સાથે ટૉપ-2માં છે.

હવે અફઘાનિસ્તાને ઇંગ્લેન્ડને હરાવીને 2 પોઈન્ટ મેળવ્યા છે. ત્યારે ટીમ ત્રીજા સ્થાને છે. ઇંગ્લેન્ડ એક પણ મેચ જીતી શક્યું નથી, સાઉથ આફ્રિકા સામેની છેલ્લી મેચ જીતે તો પણ ટીમ ફક્ત 2 પોઈન્ટ સુધી પહોંચી શકશે. જે ટૉપ-2 સ્થાન સુધી પહોંચવા માટે પૂરતું નથી. બીજી તરફ, જો અફઘાનિસ્તાન છેલ્લી મેચમાં ઓસ્ટ્રેલિયાને હરાવે છે તો ટીમ સેમિફાઈનલમાં પહોંચી જશે.