ટ્રમ્પની એપલને ધમકી છતાં, અમેરિકામાં વેચાતા 78% આઇફોન ભારતમાં બનાવવામાં આવી રહ્યા છે. માર્કેટ રિસર્ચર કેનાલિસના મતે, 2025માં જાન્યુઆરીથી જૂન દરમિયાન ભારતમાં 23.9 મિલિયન (2 કરોડ 39 લાખ) આઇફોન બનાવવામાં આવ્યા હતા, જે ગયા વર્ષ કરતા 53% વધુ છે.

રિસર્ચ ફર્મ સાયબરમીડિયા રિસર્ચ અનુસાર, ભારતમાંથી આઇફોન નિકાસ (ભારતથી વિદેશમાં મોકલવામાં આવતા આઇફોન) પણ વધીને 22.88 મિલિયન (2 કરોડ 28 લાખ) યુનિટ થઈ ગઈ છે. ગયા વર્ષના સમાન સમયગાળામાં (જાન્યુઆરીથી જૂન) ભારતમાં આઇફોન ઉત્પાદનનો આંકડો 15.05 મિલિયન (1 કરોડ 50 લાખ) હતો. એટલે કે, વાર્ષિક ધોરણે તેમાં 52%નો વધારો થયો છે.

વ્યવસાયની વાત કરીએ તો, 2025ના પહેલા છ મહિનામાં ભારતમાંથી લગભગ 1.94 લાખ કરોડ રૂપિયાના આઇફોનની નિકાસ કરવામાં આવી હતી. ગયા વર્ષે આ આંકડો 1.26 લાખ કરોડ રૂપિયા હતો.

એપ્રિલ 2025માં ભારતમાંથી અમેરિકામાં 33 લાખ આઇફોન મોકલવામાં આવ્યા હતા. જ્યારે ચીનથી મોકલવામાં આવેલા મોબાઇલની સંખ્યા 9 લાખ હતી. ભારતમાં ઉત્પાદિત આઇફોનમાંથી 78% અમેરિકા મોકલવામાં આવ્યા હતા. ગયા વર્ષે આ આંકડો 53% હતો.