શક્તિપીઠ અંબાજી મંદિરમાં નવરાત્રિની આઠમની પૂજા અને દર્શનનો વિશેષાધિકાર માત્ર દાંતા મહારાજા અને એમના વંશજો પાસેથી છીનવાયો છે. આ અંગે હાઇકોર્ટે હુકમ કર્યો છે. જેથી હવે આઠમની પૂજાના દિવસે દર્શનાર્થીઓએ મંદિરની બહાર રહેવું પડશે નહીં અને તેઓ પણ આઠમની પૂજામાં સહભાગી બની શકશે અને દર્શન કરી શકશે.

અગાઉ આપેલા તમામ વિશેષાધિકારો રદ ગુજરાત હાઈકોર્ટે આરાસુરી અંબાજી માતા દેવસ્થાનને પબ્લિક ટ્રસ્ટ તરીકે નોંધાણીનો નિર્ણય યથાવત રાખ્યો છે, અગાઉના દાંતા રાજ્યના વારસદાર મહારાજા મહેન્દ્રસિંહજી પરમાર દ્વારા દાખલ અપીલ રદ્દ કરી દીધી છે. કોર્ટે શ્રી અંબાજી માતા દેવસ્થાન ટ્રસ્ટના વહીવટકર્તા દ્વારા એડવોકેટ અર્ચના.આર.આચાર્ય દ્વારા દાખલ ક્રોસ-ઓબ્જેક્શનને પણ મંજૂરી આપી છે, જેનાથી દાંતાના મહારાજાના અગાઉ આપેલા વિશેષાધિકારો રદ્દ થઈ ગયા છે.

મંદિર લોકધર્મીય સંસ્થા છે: હાઇકોર્ટ હાઇકોર્ટમાં આ કેસ વર્ષ 2009થી ચાલી રહ્યો હતો અને તે અંબાજી મંદિરના માલિકી અને વ્યવસ્થા અધિકારો સાથે સંબંધિત છે, જે લાખો યાત્રીઓને આકર્ષતું પ્રખ્યાત ધાર્મિક સ્થળ છે. અપીલકર્તા મહારાજા મહેન્દ્રસિંહજી પરમારે નવરાત્રિના આઠમા દિવસે વિશેષ પૂજા કરવાનો વારસાહક અધિકારનો દાવો કર્યો હતો. જેને નીચલી કોર્ટ દ્વારા પહેલાં માન્ય રાખવામાં આવ્યો હતો. હાઇકોર્ટે ચુકાદો આપ્યો કે મંદિર લોકધર્મીય સંસ્થા છે. રાજ્ય દ્વારા મંદિરની વ્યવસ્થા કરવાથી બંધારણના અનુચ્છેદ 25 અને 26 હેઠળ ધાર્મિક અધિકારોનું ઉલ્લંઘન થતું નથી, કારણ કે આ અધિકારો ધાર્મિક વ્યવહારોને સુરક્ષિત કરે છે પરંતુ લોકવ્યવહારને નહીં.