અદાણી ગ્રુપે આવતા વર્ષે ડિફેન્સ મેન્યુફેક્ચરિંગમાં ₹1.8 લાખ કરોડનું રોકાણ કરવાનો પ્લાન કર્યો છે. કંપની આ રોકાણ દ્વારા માનવરહિત અને ઓટોનોમસ સિસ્ટમ્સ, એડવાન્સ્ડ ગાઈડેડ વેપન્સ બનાવવા પર ભાર મૂકશે, જેથી ભવિષ્યની લડાઈની જરૂરિયાતો અનુસાર પ્રોડક્ટ્સ બનાવી શકાય.

PTIના રિપોર્ટ અનુસાર, 2025માં ઓપરેશન સિંદૂર જેવા મિશન્સમાં અદાણીના મિલિટરી હાર્ડવેરનો ઉપયોગ થઈ ચૂક્યો છે. અદાણી ડિફેન્સ એન્ડ એયરોસ્પેસ આવતા વર્ષે AI-ઇનેબલ્ડ મલ્ટી-ડોમેન ઓપરેશન્સ, સેન્સર અને ઇલેક્ટ્રોનિક્સ, અને મોટા પાયે MRO (મેન્ટેનન્સ, રિપેર અને ઓવરહોલ) ટ્રેનિંગ ઇન્ફ્રાસ્ટ્રક્ચરમાં રોકાણ કરશે.

ત્રણેય સેનાઓમાં સામેલ થયા અદાણીના હથિયારો

અદાણી ડિફેન્સ દેશના સૌથી મોટા ઇન્ટિગ્રેટેડ પ્રાઇવેટ સેક્ટર ડિફેન્સ પ્લેયર્સમાંથી એક તરીકે ઉભરી આવ્યું છે. 2025માં તેના ઘણા સૈન્ય સાધનોનો ઉપયોગ 'ઓપરેશન સિંદૂર'માં પણ કરવામાં આવ્યો હતો.

નૌકાદળ અને સેનામાં ડ્રોન: 2025માં કંપનીના દ્રષ્ટિ 10 UAVs (માનવરહિત હવાઈ વાહન)ને લાંબા અંતરના ઇન્ટેલિજન્સ, સર્વેલન્સ અને રિકોનિસન્સ મિશન (ISR) માટે ભારતીય નૌકાદળ અને સેનામાં સામેલ કરવામાં આવ્યા.
કાઉન્ટર-ડ્રોન સિસ્ટમ: તેના કાઉન્ટર-ડ્રોન સિસ્ટમે સેના, નૌકાદળ અને વાયુસેના દ્વારા કરવામાં આવેલા ટ્રાયલ પાસ કરી લીધા છે.
ગાઇડેડ વેપન્સ: કંપનીના અગ્નિકા લોઇટરિંગ મ્યુનિશન્સે ઇલેક્ટ્રોનિક વોરફેર (યુદ્ધ)માં પણ પોતાની ક્ષમતા દર્શાવી. આ ઉપરાંત, ખભા પર રાખીને ઝીંકવામાં આવતી મિસાઈલ સિસ્ટમ ARKA MANPADSને પણ ત્રણેય સેનાઓ માટે તૈયાર કરી લેવામાં આવી છે.