દેશમાં હાઇબ્રિડ વાહનોનું વેચાણ સમગ્ર રીતે ઇલેક્ટ્રિક વાહનો (ઇવી)ની તુલનાએ અનેકગણી ઝડપે વધી રહ્યું છે. જો આ ટ્રેન્ડ યથાવત્ રહેશે તો હાઇબ્રિડ મૉડલો સાથે કડી સ્પર્ધાનો સામનો કરવો પડશે. હાઇબ્રિડ કાર પેટ્રોલ-ડીઝલની સાથે ઇલેક્ટ્રિક કાર પર પણ ચાલે છે. તેનાથી તેની રનિંગ કૉસ્ટ ઘટી જાય છે.

ઑટોમોટિવ માર્કેટ રિસર્ચ કંપની જેટો ડાયનેમિક્સ અનુસાર, આ વર્ષે જાન્યુઆરીથી જુલાઇ સુધી ઇવીનું વેચાણ 131% વધીને 58,076 થયું હતું. પરંતુ આ દરમિયાન હાઇબ્રિડ વાહનોનું વેચાણ 32 ગણું (3,113%) વધીને 47,124 એકમ નોંધાયું હતું. તેની તુલનાએ જાન્યુઆરી-જુલાઇ 2022માં 25,100 ઇવી, જ્યારે માત્ર 1,467 હાઇબ્રિડ વાહનોનું વેચાણ થયું હતું. પરંતુ, આઇસીઇ (પેટ્રોલ-ડીઝલથી ચાલતા) વાહનોનું વેચાણ 5%થી પણ ઓછુ વધ્યું હતું. આ વર્ષે જુલાઇ સુધી અંદાજે 22 લાખ આઇસીઇ વાહનોનું વેચાણ થયું હતું. ગત વર્ષે સમાન સમયગાળામાં આ પ્રકારની 21 લાખ કારનું વેચાણ નોંધાયું હતું. આગામી સમયમાં વેચાણને વેગ મળશે.