ચેમ્પિયન્સ ટ્રોફી 2025માં ઓસ્ટ્રેલિયા-અફઘાનિસ્તાન મેચ વરસાદને કારણે રદ કરવામાં આવી હતી. આ સાથે ઓસ્ટ્રેલિયન ટીમ આ સિઝનની સેમિફાઈનલમાં પહોંચી ગઈ છે. તે જ સમયે, અફઘાનિસ્તાનની આશાઓ શનિવારે કરાચીમાં યોજાનારી ઇંગ્લેન્ડ-સાઉથ આફ્રિકા મેચ પર ટકેલી છે.

શુક્રવારે લાહોરના ગદ્દાફી સ્ટેડિયમમાં અફઘાનિસ્તાને ટૉસ જીતીને પહેલા બેટિંગ કરવાનો નિર્ણય લીધો હતો. ટીમ 50 ઓવરમાં 273 રનમાં ઓલઆઉટ થઈ ગઈ. સિદીકુલ્લાહ અટલે 85 અને અઝમતુલ્લાહ ઓમરઝાઈએ 67 રન બનાવ્યા. બેન દ્વારશીસે 3 વિકેટ લીધી.

274 રનના ટાર્ગેટને ચેઝ કરતા ઓસ્ટ્રેલિયાએ એક વિકેટ ગુમાવીને 109 રન બનાવી લીધા હતા. પછી વરસાદ શરૂ થયો અને રમત બંધ કરવી પડી. ટ્રેવિસ હેડ 40 બોલમાં 59 રન બનાવીને અને કેપ્ટન સ્ટીવ સ્મિથ 22 બોલમાં 19 રન બનાવીને અણનમ રહ્યા.

ઓસ્ટ્રેલિયા સેમિફાઈનલમાં પહોંચ્યું: વરસાદને કારણે મેચ અનિર્ણિત રહેતા બંને ટીમને એક-એક પોઇન્ટ મળ્યો. ઓસ્ટ્રેલિયાના કુલ 4 પોઈન્ટ છે. આ સ્થિતિમાં, ટીમ સેમિફાઈનલમાં પહોંચી ગઈ છે.

અફઘાનિસ્તાન ઇંગ્લેન્ડ-દક્ષિણ આફ્રિકા મેચ પર નિર્ભર: અફઘાનિસ્તાનના 3 પોઈન્ટ છે. સાઉથ આફ્રિકાના પણ 3 પોઈન્ટ છે. જોકે, નેટ રન રેટમાં આફ્રિકા આગળ છે. જો સાઉથ આફ્રિકા આગામી મેચ જીતી જાય તો અફઘાનિસ્તાન બહાર થઈ જશે. તે જ સમયે, જો આફ્રિકા મોટા માર્જિનથી હારી જાય છે, તો અફઘાનિસ્તાન ટૉપ-4 માં પહોંચી જશે.