ભારતીય ઓલિમ્પિક એસોસિયેશન (IOA)એ રેસલિંગ ફેડરેશન ઓફ ઈન્ડિયા (WFI)નો હવાલો સંભાળતી એડ-હોક સમિતિને ભંગ કરી દીધી છે. હકીકતમાં, WFI પર કેન્દ્રીય રમત મંત્રાલય દ્વારા રમતગમતની માર્ગદર્શિકાનું પાલન ન કરવા બદલ પ્રતિબંધ મૂકવામાં આવ્યો હતો. જો કે મંત્રાલય દ્વારા હજુ સુધી પ્રતિબંધ હટાવવામાં આવ્યો નથી. રમત મંત્રાલય દ્વારા WFIના પ્રતિબંધ પછી, IOA એ ફેડરેશનના કામકાજને જોવા માટે એક એડ-હોક કમિટીની રચના કરી હતી.

વર્લ્ડ રેસલિંગ ફેડરેશને પણ પ્રતિબંધ હટાવી લીધો છે
આ મહિને જ વર્લ્ડ રેસલિંગ ફેડરેશને WFIની સદસ્યતા પુનઃસ્થાપિત કરી હતી. વર્લ્ડ રેસલિંગે ફેડરેશનની ચૂંટણી સમયસર ન કરાવવા બદલ ગયા વર્ષે ઑગસ્ટમાં WFIની સદસ્યતા રદ કરી હતી, પરંતુ તાજેતરમાં તેમણે એક બેઠક યોજી હતી જેમાં તેણે કેટલીક શરતો સાથે WFIનું સભ્યપદ પુનઃસ્થાપિત કરવાનો નિર્ણય લીધો હતો.

IOAના નિર્ણય પર સંજય સિંહે કહ્યું- જલ્દી જ નેશનલ કેમ્પનું આયોજન કરશે
અમને ફેડરેશન પર સંપૂર્ણ નિયંત્રણ આપવા બદલ અમે IOAનો આભાર માનીએ છીએ. અમે ટૂંક સમયમાં રાષ્ટ્રીય કેમ્પનું આયોજન કરીશું અને જો કુસ્તીબાજો વિદેશમાં તાલીમ લેવા માંગતા હોય તો અમે દરેક સુવિધા પૂરી પાડીશું. મને ખાતરી છે કે આ આપણા સંઘર્ષનો અંત છે. WFIના પ્રમુખ સંજય સિંહે IOAની એડહોક કમિટીના વિસર્જન અંગે PTIને જણાવ્યું હતું.

એડહોક કમિટી દ્વારા ટ્રાયલ હાથ ધરવામાં આવી હતી
એશિયન ચેમ્પિયનશિપ અને ઓલિમ્પિક ક્વોટા સ્પર્ધાઓમાં ભાગ લેવા માટે કુસ્તીબાજોની પસંદગી કરવા માટે એડહોક સમિતિએ તાજેતરમાં પુરૂષો અને મહિલા વર્ગોમાં ટ્રાયલ હાથ ધર્યા હતા. જ્યારે બજરંગને પુરૂષ વર્ગમાં હારનો સામનો કરવો પડ્યો હતો, જ્યારે વિનેશ ફોગાટ મહિલા વર્ગમાં ડ્રામા બાદ જીત નોંધાવવામાં સફળ રહી હતી.